काठमाडौं । राष्ट्रिय स्वतन्त्र पार्टीका सभापति रवि लामिछानेले विपत्तिको समयमा सरकारलाई प्रश्न गर्नेभन्दा राज्यका प्रयासलाई साथ दिनुपर्ने बताएका छन्।

उनले प्राकृतिक विपत्तिलाई सत्तापक्ष र विपक्षीको दृष्टिकोणबाट हेर्न नमिल्ने भन्दै बाढीपीडितको उद्धार, राहत र सुरक्षामा राज्यले आफ्नो सम्पूर्ण शक्ति परिचालन गरेको दाबी गरे।

लामिछानेले बाढीपीडितका लागि खाद्यान्न, आवास तथा बसोबासको व्यवस्था गर्नेदेखि तत्कालीन आवश्यकता पूरा गर्न राज्य सक्रिय रहेको बताए।

उनले भने, ‘सरकारलाई प्रश्न गर्ने आधार छैन। सत्तापक्ष र विपक्षीको आँखाले विपत्तिमा हेर्न मिल्दैन। राज्यले आफ्नो सम्पूर्ण शक्ति लगाएको छ। राज्यले बाढीपीडितका लागि सम्पूर्ण व्यवस्था गरेको छ।’

लामिछानेले विपत्तिको समयमा सरकारलाई सहयोग गर्ने सबैलाई धन्यवाद दिनुपर्ने बताए। उनका अनुसार राज्य अहिले सुरुङभित्र फसेका नागरिकको जीवन खोज्नेदेखि सहाराविहीन नागरिकको सहारा बन्नेसम्मको भूमिकामा सक्रिय छ।

‘राज्य यतिबेला सुरुङभित्र आफ्ना नागरिकको ज्यान खोजिरहेको छ। राज्य सहाराविहीनको सहारा बनिरहेको छ,’ उनले भने।