काठमाडौं । नेकपा एमालेका अध्यक्ष केपी शर्मा ओलीले भदौ २४ गते भएको विध्वंसले मुलुकलाई कम्तीमा २५ वर्ष पछाडि धकेलेको दाबी गरेका छन्। उनले उक्त दिनलाई देशका लागि ‘कालो दिन’को संज्ञा दिएका छन्।

बालकोटस्थित आगजनीबाट क्षतिग्रस्त आफ्नै घरमा पुगेका ओलीले सञ्चारकर्मीसँग कुरा गर्दै भौतिक संरचनाको क्षतिसँगै मुलुकको विकास र समग्र यात्रामै ठूलो धक्का पुगेको बताए।

‘देश २५ वर्षभन्दा धेरै पछि परेको छ,’ ओलीले भने, ‘अहिले रमाउनेहरू पनि कम्तीमा २५ वर्ष पछाडि परेका छन्। यसको असर भोग्दै गएपछि मात्रै अहिले रमाउनेहरूले पनि थाहा पाउनेछन्।’

ओलीले भदौ २४ को घटनालाई सामान्य राजनीतिक असन्तुष्टिको अभिव्यक्तिका रूपमा मात्रै बुझ्न नहुने बताए। आगजनी, तोडफोड र विध्वंसका कारण मुलुकले दीर्घकालीन क्षति बेहोर्नुपर्ने उनको भनाइ थियो।

पछिल्लो समय गृहमन्त्री सुधन गुरुङले पुराना दलका नेताहरूलाई सुध्रिन चेतावनी दिएको प्रसंगमा पनि ओलीले व्यंग्य गरेका छन्। पुराना नेताले अहिलेका सत्तापक्षको प्रशंसा गर्नुपर्ने हो कि भन्ने आशयमा उनले प्रश्न गरे।

गृहमन्त्रीको अभिव्यक्तिलाई लक्षित गर्दै ओलीले विगतमा आफूहरू हेलिकप्टरबाट भाग्नुपरेको प्रसंगसमेत जोडे। अहिले पनि त्यस्तै चेतावनी दिइएको भन्दै उनले सरकारमा रहेका नयाँ पुस्ताप्रति व्यंग्य गरे।

‘पहिले हेलिकप्टर चढेर भागेका थियौँ, अहिले त्यो पनि हाम्रै हातमा छ। चढिहाल्यौँ भने पनि जाक्दिन्छौँ भन्नुभएको छ,’ ओलीले भने।

उनले राजनीतिक क्षेत्रमा नयाँ अनुहार र नयाँ समूह आउनु अस्वाभाविक नभए पनि उनीहरूको व्यवहार र अभिव्यक्तिमा परिपक्वता आवश्यक हुने संकेत गरे।

‘यस्ता केटाकेटीहरू धेरै आए, धेरै गए,’ ओलीले व्यंग्य गर्दै भने।