काठमाडौं। पृथ्वी राजमार्गको कृष्णभीरमा खसेको पहिरोले मुख्य सडक १० दिनदेखि ठप्प हुँदा त्यसको असर अब वैकल्पिक मार्गमा समेत देखिन थालेको छ।

काठमाडौं–हेटौँडा सडकमा सवारीसाधनको चाप अस्वाभाविक रूपमा बढेपछि सामान्य यात्रासमेत घण्टौँ लम्बिन थालेको छ।

पृथ्वी राजमार्गबाट काठमाडौं आउने–जाने अवस्था सहज नभएपछि सवारीसाधनलाई हेटौँडा–काठमाडौं सडकतर्फ मोडिएको छ। त्यसैको परिणाम, पछिल्लो एक सातादेखि यो सडकमा ट्रक, बस र निजी सवारीको बाक्लो चाप देखिएको हो।

सवारी व्यवस्थापनका लागि जिल्ला प्रशासन कार्यालय मकवानपुरले भदौ १६ गतेदेखि काठमाडौं–हेटौँडा आवतजावत गर्ने सवारीलाई छुट्टाछुट्टै रुट तोकेको छ। तर, साँघुरो पहाडी सडकमा एकैपटक बढेको सवारी चापले जामको समस्या भने घट्न सकेको छैन।

१० चक्कासम्मका मालवाहक गाडी काठमाडौं आउँदा त्रिभुवन राजपथ र फर्किंदा कान्ति राजमार्ग प्रयोग गरिरहेका छन्। हेटौँडाबाट काठमाडौं आउने १४ सिटभन्दा कम क्षमताका सवारी भीमफेदी–कुलेखानी–सिस्नेरी–दक्षिणकाली हुँदै सञ्चालन भइरहेका छन्।

काठमाडौं फर्किने सवारीलाई भने फर्पिङ–फाखेल–कुलेखानी–भीमफेदी रुट प्रयोग गराइएको छ।

सवारीको चाप बढेपछि सामान्य अवस्थामा करिब तीन घण्टामा पूरा हुने हेटौँडा–काठमाडौं यात्रा अहिले पाँच घण्टासम्म लम्बिएको छ। पहाडी सडकको साँघुरोपन र बढ्दो मालवाहक तथा यात्रुवाहक सवारीका कारण यात्रुहरू लामो समय जाममा बस्न बाध्य छन्।

यसको असर यात्रुको आवतजावतमा मात्रै सीमित छैन। काठमाडौंका लागि अत्यावश्यक खाद्यान्न, ग्यासलगायत सामग्री बोकेका सवारीसमेत यही वैकल्पिक मार्गबाट चल्न थालेपछि ढुवानी व्यवस्थामा समेत दबाब परेको छ।

कृष्णभीरमा पहिरो खसेपछि पश्चिम नेपालतर्फ जाने सार्वजनिक यातायात तथा अत्यावश्यक वस्तु बोकेका सवारीले वैकल्पिक मार्ग प्रयोग गरिरहेका छन्। मुख्य राजमार्ग लामो समय अवरुद्ध रहँदा एउटा सडकको समस्या अर्को सडकमा सवारी चापका रूपमा सर्दै गएको छ।

पृथ्वी राजमार्ग कहिले सहज हुन्छ भन्ने टुंगो नलाग्दा हेटौँडा–काठमाडौं सडकमा परेको अतिरिक्त चाप तत्काल हट्ने अवस्था देखिएको छैन। पहिरो पन्छाएर मुख्य सडक सञ्चालनमा नल्याएसम्म वैकल्पिक सडकले पनि यात्रुको सास्ती धान्नुपर्ने देखिएको छ।

तस्बिर : नेपाल फोटो लाइब्रेरी