काठमाडौं । बजारमा ग्यासको हाहाकार भएपछि विद्यार्थीहरू सडकमा दाउरा बालेर खाना पकाउन बाध्य भएका छन् ।

ग्यास अभावविरुद्ध सांकेतिक विरोध जनाउँदै अखिल (क्रान्तिकारी)मा आबद्ध विद्यार्थीले बिहीबार रत्न राज्यलक्ष्मी (आरआर) क्याम्पसको गेटमै खाना पकाएका हुन् ।

विद्यार्थीहरूले दाउरामा भात र गुन्द्रुक–आलु पकाएर त्यहीँ बसेर खाए । उनीहरूले ग्यासको अभावले विद्यार्थीको दैनिक जीवन नै प्रभावित भएको भन्दै सरकारको ध्यानाकर्षण गराउन यस्तो विरोध गरेको बताएका छन् ।

ग्यास लिन लामो समय लाइनमा बस्नुपर्ने अवस्था आएपछि कतिपय विद्यार्थी पढाइ छाडेर ग्यासको खोजीमा भौंतारिनुपरेको छ । डेरामा खाना पकाउन नसक्दा चाउचाउ र बिस्कुटको भरमा बस्नुपरेको विद्यार्थीहरूको गुनासो छ ।

बजारको ग्यास अभाव तत्काल समाधान गरी सहज आपूर्ति व्यवस्था गर्नुपर्ने माग गर्दै विद्यार्थीले आरआर क्याम्पस गेटमा दाउरामा खाना पकाएर विरोध जनाएका हुन् ।

तस्बिर : नेपाल फोटो लाइब्रेरी