काठमाडौं । नेकपा एमालेका सांसद गुरु प्रसाद बरालले जेनजी आन्दोलनका क्रममा भएको तोडफोड, आगजनी, लुटपाट र मानवीय क्षतिको निष्पक्ष छानबिन गरी दोषीमाथि कारबाही गर्न सरकारसँग माग गरेका छन् ।

बिहीबार प्रतिनिधिसभाको बैठकमा बोल्दै बरालले युवा–विद्यार्थीको शान्तिपूर्ण आन्दोलनलाई योजनाबद्ध रूपमा हिंसात्मक बनाइएको दाबी गरे । सरकारी तथा सार्वजनिक संरचना, न्यायालय, सुरक्षा निकाय, राजनीतिक दलका कार्यालय र निजी प्रतिष्ठानमाथि भएको आक्रमणको गम्भीर अनुसन्धान हुनुपर्ने उनको भनाइ थियो ।

उनले संसद् भवन, शीतल निवास, सिंहदरबार, प्रधानमन्त्री तथा मन्त्रिपरिषद्को कार्यालय, गृह तथा स्वास्थ्य मन्त्रालयलगायतका संरचनामा भएको क्षतिको यथार्थ बाहिर ल्याउन माग गरे ।

‘युवा विद्यार्थीको शान्तिपूर्ण आन्दोलन गर्ने अधिकारलाई उपद्रवकारीहरूले योजनाबद्ध रूपमा तोडफोड, आगजनी, हिंसा र मृत्युमा रूपान्तरण गरे,’ बरालले भने, ‘यसमा को दोषी हो भन्ने कुरा कानुनी राज्यको कसीमा खोजिनुपर्छ ।’

न्यायालयका भवन, नागरिकका अभिलेख र प्रमाण नष्ट गरिएको भन्दै उनले सर्वोच्च अदालतसहित विभिन्न अदालतमा भएको क्षतिको समेत अनुसन्धान गर्न माग गरे । कारागारमा आक्रमण गरी कैदीबन्दी भगाइएको घटनाको कारण र संलग्न व्यक्तिबारे समेत छानबिन हुनुपर्ने उनको भनाइ थियो ।

निजी क्षेत्रका व्यापारिक प्रतिष्ठान, होटल र बैंकमा भएको लुटपाट तथा आगजनी, प्रहरीमाथिको आक्रमण र हतियार लुटिएको घटनाको पनि हिसाब खोज्नुपर्ने उनले बताए ।

‘राष्ट्रसेवक प्रहरीमाथि किन हमला भयो, हतियार कसले लुट्यो ? हजारौँ सरकारी र निजी सवारी साधन कसले जलायो ? यसको निरूपण हुनु आजको आवश्यकता हो,’ उनले भने ।

राष्ट्रिय मानव अधिकार आयोगले घटनालाई पूर्वयोजनाअनुसार संगठित आपराधिक कार्यका रूपमा उल्लेख गरेको प्रसंग स्मरण गराउँदै बरालले यस्ता घटनालाई दबाएर राख्न नहुने बताए ।

उनले भदौ २३ र २४ का घटनाको सत्यतथ्य पत्ता लगाउने, दोषीमाथि कानुनी कारबाही गर्ने र भएको राष्ट्रिय क्षतिको परिपूरण गर्ने विषयमा प्रतिनिधिसभाले सक्रिय भूमिका खेल्नुपर्ने माग गरे ।

यसैबीच बरालले रसुवाको भोटेकोशी बाढीबाट भएको क्षतिको राहत, उद्धार तथा दीर्घकालीन समाधानका लागि उच्चस्तरीय सर्वदलीय संसदीय समिति गठन गर्नसमेत माग गरेका छन् ।