काठमाडौं । सोलुखुम्बुको महाकुलुङ गाउँपालिकाका–२ र ४ भएर बग्ने हुङ्गु (हुङ्का) खोला पहिरो खसेपछि थुनिएको छ । शुक्रबार बिहान खसेको पहिरोले खोला रोकिएपछि त्यहाँ कृत्रिम ताल बनेको छ ।

गौरीशंकर हाइड्रोपावरको कार्यालयबाट करिब एक सय मिटर तल वडा नम्बर २ तर्फ करिब ३५ मिटर अग्लो पहिरो खसेको प्रहरीले जनाएको छ । पहिरोले खोला थुनेपछि करिब एक सय मिटर लामो र १५ मिटर गहिरो पानी जमेको छ ।

सोलुखुम्बुका प्रहरी प्रमुख डीएसपी नवीनराजा बुढाथोकीका अनुसार पहिरोले बनाएको अवरोधमाथिबाट अहिले पानी विस्तारै बग्न थालेको छ । त्यसका कारण तत्काल ठूलो जोखिम नदेखिए पनि कृत्रिम बाँध पूर्ण रूपमा सुरक्षित भने नरहेको उनले बताएका छन् ।

अवरोध फुटेर एक्कासि पानी बगेमा हुङ्गु खोलाको तल्लो तटीय क्षेत्रमा बाढीको असर पर्न सक्ने भएकाले स्थानीयलाई सतर्क रहन आग्रह गरिएको छ । प्रहरीले नदी किनारमा बसोबास गर्ने स्थानीय तथा आसपासका दुई जलविद्युत् आयोजनालाई समेत उच्च सतर्कता अपनाउन भनेको छ ।

घटनास्थल इलाका प्रहरी कार्यालय बुङबाट करिब १० किलोमिटर दक्षिण–पूर्वमा पर्छ ।

पहिरोले बनाएको अस्थायी बाँध जुनसुकै बेला फुट्न सक्ने सम्भावना पूर्ण रूपमा हटिसकेको छैन । बाँध फुटेमा हुङ्गु खोलाको बाढी सोताङ र थुलुङ दुधकोशी गाउँपालिका हुँदै खोटाङ र ओखलढुङ्गातर्फ बग्ने दुधकोशी नदी प्रणालीसम्म प्रभाव पार्न सक्ने जोखिम रहेको प्रहरीले जनाएको छ ।

प्रहरीका अनुसार पहिरोको माथिल्लो भागबाट पानी बग्न थालेकाले तत्कालका लागि ठूलो जोखिम नरहेको भए पनि पानीको बहाव र बाँधको अवस्थामाथि निगरानी भइरहेको छ ।