काठमाडौं । बेलायत र इजरायलका वैज्ञानिकहरूले मानिसमा नयाँ रक्त समूह प्रणाली पत्ता लगाएका छन्।

अन्तर्राष्ट्रिय रक्तसञ्चार सोसाइटीले यसलाई मानव शरीरको ४९औँ रक्त समूह प्रणालीका रूपमा मान्यता दिएको छ।

वैज्ञानिकहरूले एक इजरायली महिला र उनका भाइको रगतमा भेटिएको दुर्लभ एन्टिबडीको अध्ययन गर्ने क्रममा नयाँ रक्त समूह पहिचान गरेका हुन्।

अनुसन्धानका क्रममा एफ ११ आर जीन र त्यसबाट बन्ने जाम-ए प्रोटिनसँग सम्बन्धित आनुवंशिक परिवर्तन फेला परेको थियो। यही परिवर्तन नयाँ रक्त समूह प्रणालीसँग सम्बन्धित रहेको वैज्ञानिकहरूले बताएका छन्।

नयाँ रक्त समूह प्रणालीलाई ‘जाम’ नाम दिइएको छ। यस रक्त समूह भएका व्यक्तिको रातो रक्तकोषिकामा सामान्य मानिसमा पाइने एउटा विशेष एन्टिजन हुँदैन।

यस्तो दुर्लभ रक्त समूह भएका व्यक्तिलाई सामान्य रगत दिइएमा शरीरले एन्टिबडी बनाएर चढाइएको रातो रक्तकोषिकामाथि आक्रमण गर्न सक्छ। यसबाट गम्भीर रक्तसञ्चार प्रतिक्रिया हुनसक्ने जोखिम हुन्छ।

वैज्ञानिकहरूका अनुसार नयाँ खोजले दुर्लभ रक्त समूह भएका बिरामी र उनीहरूका लागि उपयुक्त रक्तदाताको पहिचान गर्न सहयोग गर्नेछ।

डीएनए परीक्षणमार्फत बिरामी र रक्तदाताको रक्त समूह पहिचान गर्न सकिने भएकाले भविष्यमा सुरक्षित रक्तसञ्चारमा यो खोज उपयोगी हुने अपेक्षा गरिएको छ।

विशेषगरी दुर्लभ एन्टिबडी भएका बिरामीको उपचार र रक्त व्यवस्थापनमा नयाँ रक्त समूह प्रणालीको पहिचान महत्वपूर्ण हुने वैज्ञानिकहरूको भनाइ छ।