काठमाडौं । नेपाल भलिबल लिग (एनभीएल) को पहिलो संस्करणको च्याम्पियन अन्नपूर्ण स्पाइकर किङ्सले ‘एक्स्ट्रिम गौरवको यात्रा’ नामक ट्रफी टुर सम्पन्न गरेको छ।

एक्स्ट्रिम इनर्जी ड्रिंकसँगको सहकार्यमा आयोजित टुरअन्तर्गत च्याम्पियन ट्रफीलाई अन्नपूर्ण आधार शिविर (एबीसी) पुर्‍याइएको थियो। 

नेपाली भलिबलको सफलतालाई खेलप्रेमीमाझ पुर्‍याउने र खेल संस्कृतिको प्रवर्द्धन गर्ने उद्देश्यले ट्रफी टुर आयोजना गरिएको आयोजकले जनाएको छ।

टुरका क्रममा गण्डकी प्रदेशका विभिन्न प्रमुख सहर तथा पर्यटकीय क्षेत्रमा ट्रफी प्रदर्शन गर्नुका साथै खेलाडी, समर्थक र स्थानीय समुदायसँग भेटघाट तथा अन्तर्क्रिया गरिएको थियो।

नेपालको पहिलो व्यावसायिक पुरुष फ्रेन्चाइज भलिबल लिगका रूपमा आयोजित एनभीएलको पहिलो संस्करण भदौ १९ देखि २७ गतेसम्म काठमाडौंको त्रिपुरेश्वरस्थित राष्ट्रिय खेलकुद परिषद्को कभर्डहलमा सञ्चालन भएको थियो।

साथै, प्रतियोगितामा अन्नपूर्ण स्पाइकर किङ्ससहित काठमाडौं रेड्स, कर्णाली शिवराज, खप्तड फाल्कन्स, मधेश वारियर्स र सगरमाथा स्क्वाड गरी ६ टोली सहभागी थिए।

फाइनलमा अन्नपूर्ण स्पाइकर किङ्सले कर्णाली शिवराजलाई २५–१५, २५–२० र २५–१८ को सोझो सेटमा पराजित गर्दै उपाधि जितेको थियो। उपाधिसँगै अन्नपूर्णले २० लाख रुपैयाँ नगद पुरस्कार प्राप्त गरेको थियो।