काठमाडाैं । स्वास्थ्य सेवा प्रवाह, तथ्याङ्क व्यवस्थापन र विभिन्न स्वास्थ्य सेवा सूचकमा उत्कृष्ट कार्यसम्पादन गरेको भन्दै जनस्वास्थ्य कार्यालय ललितपुरले किष्ट शिक्षण अस्पताललाई सम्मान गरेको छ ।

जनस्वास्थ्य कार्यालयले आयोजना गरेको वार्षिक स्वास्थ्य सेवा तथ्याङ्क प्रस्तुतीकरण तथा समीक्षा कार्यक्रममा जिल्लाका निजी अस्पतालमध्ये किष्ट शिक्षण अस्पतालले पहिलो स्थान हासिल गरेको जानकारी दिइएको हो ।

जिल्ला जनस्वास्थ्य कार्यालयका प्रमुख डा. खगेश्वर गेलालका अनुसार वार्षिक समीक्षाका क्रममा निर्धारित स्वास्थ्य सेवा सूचकका आधारमा अस्पतालहरूको सेवा प्रवाह र कार्यसम्पादन मूल्याङ्कन गरिएको थियो । सोही मूल्याङ्कनका आधारमा किष्टलाई उत्कृष्ट ठहर गरिएको हो ।

कार्यक्रममा ललितपुर जिल्लाअन्तर्गतका १५ वटा निजी अस्पताल सहभागी थिए । सहभागी अस्पतालहरूले वर्षभरि प्रवाह गरेका स्वास्थ्य सेवाको तथ्याङ्क प्रस्तुत गरेका थिए । त्यसपछि सेवा प्रवाह, तथ्याङ्क व्यवस्थापन र विभिन्न स्वास्थ्य सूचकको अवस्थाबारे समीक्षा गरिएको थियो ।

किष्ट शिक्षण अस्पतालका प्रबन्ध निर्देशक डा. अभिषेक थापाले सम्मानलाई अस्पतालले गुणस्तरीय स्वास्थ्य सेवा र प्रभावकारी व्यवस्थापनमा गर्दै आएको प्रयासको मान्यताका रूपमा लिएको बताए ।

उनका अनुसार अस्पतालले तथ्यमा आधारित स्वास्थ्य सेवा प्रणालीलाई प्राथमिकता दिँदै आएको छ । प्राप्त सम्मानले स्वास्थ्य सेवाको गुणस्तर सुधार गर्ने प्रतिबद्धतालाई थप बल पुगेको उनले बताए ।

साथै, अस्पतालले आगामी दिनमा पनि गुणस्तरीय, विश्वसनीय र सेवाग्राहीमैत्री स्वास्थ्य सेवा प्रवाहलाई निरन्तरता दिने जनाएको छ ।