काठमाडौं । प्रधानमन्त्री बालेन्द्र शाहले मलेसियाका समकक्षी अनवर इब्राहिमसँग नेपाल-मलेसिया वैदेशिक रोजगारीका विषयमा टेलिफोनमार्फत छलफल गरेका छन्।

आज बिहान भएको कुराकानीमा प्रधानमन्त्री शाहले नेपाली श्रमिकका लागि मलेसियाको रोजगारीलाई मर्यादित, पारदर्शी र शोषणमुक्त बनाउनुपर्नेमा जोड दिएका छन्।

शाहले मलेसियाको रोजगारी क्षेत्रमा देखिएको सिन्डिकेट र बिचौलिया प्रथाप्रति आफ्नो तथा सरकारको असन्तुष्टि रहेको स्पष्ट पारेका छन्। उनले श्रमिकलाई अनावश्यक आर्थिक तथा अन्य बोझ पार्ने अव्यावहारिक र अन्यायपूर्ण प्रवृत्ति स्वीकार्य नहुने धारणा राखेका छन्।

प्रधानमन्त्री शाहले वैदेशिक रोजगारीका क्रममा नेपाली श्रमिकले भोग्नुपरेका समस्या समाधान गर्न नेपाल र मलेसियाबीच थप समन्वय आवश्यक रहेको बताएका छन्।

शाहको धारणालाई सकारात्मक रूपमा लिँदै मलेसियाका प्रधानमन्त्री इब्राहिमले आफू पनि सिन्डिकेट र बिचौलिया प्रथाको विपक्षमा रहेको स्पष्ट पारेका छन्।

इब्राहिमले यस विषयमा मलेसियाका श्रममन्त्रीलाई नेपालका श्रममन्त्रीसँग तत्काल समन्वय गरी आवश्यक काम अघि बढाउन निर्देशन दिने प्रतिबद्धता व्यक्त गरेका छन्।

दुवै प्रधानमन्त्रीबीचको छलफलले नेपालबाट मलेसिया जाने श्रमिकको भर्ती प्रक्रिया पारदर्शी बनाउने तथा वैदेशिक रोजगारीमा देखिएका बिचौलिया र सिन्डिकेटसम्बन्धी समस्या समाधानका लागि दुई देशबीच सहकार्य अघि बढाउने विषयलाई प्राथमिकता दिएको छ।