काठमाडौं। प्रधानमन्त्री वालेन्द्र शाह(बालेन)विदेश जाँदा पनि आफ्नो ‘प्रोटोकल र परम्परा’ देखाउँदै छन्। यसपटक उनको बिदाइमा विमानस्थलमा न गार्ड अफ अनर हुनेछ, न रेड कार्पेट।

संयुक्त राष्ट्रसंघको ८१औँ महासभामा सहभागी हुन मंगलबार साँझ न्युयोर्क जान लागेका शाहको बिदाइका लागि त्रिभुवन अन्तर्राष्ट्रिय विमानस्थलमा कुनै औपचारिक कार्यक्रम नराखिएको प्रधानमन्त्रीको सचिवालयले जनाएको छ।

भोटेकोशी बाढीले देश शोकमा रहेका बेला विमानस्थलमा सरकारी तामझाम देखाउनु उचित नहुने शाहको धारणा छ। त्यसैअनुसार सेनाको गार्ड अफ अनर, रेड कार्पेट र भीआईपी लाउन्जको औपचारिक बिदाइ हटाइएको हो।

बिदाइ मात्रै होइन, न्युयोर्क पुगेपछि पनि शाहले भेटघाट घटाएका छन्।

विभिन्न देशका सरकार प्रमुखले द्विपक्षीय भेटका लागि आग्रह गरे पनि यसपटक त्यस्ता भेटवार्ता नगर्ने उनको निर्णय छ। महासभाको ‘जनरल डिबेट’मा सम्बोधन गर्ने र राष्ट्रसंघका महासचिव एन्टोनियो गुटेरेससँग शिष्टाचार भेट गर्ने कार्यक्रम मात्रै राखिएको छ।

कूटनीतिक वृत्तमा भने यस्तो निर्णयलाई फरक ढंगले हेरिएको छ। प्रधानमन्त्रीको विदेश भ्रमणमा द्विपक्षीय भेटघाटलाई महत्वपूर्ण कूटनीतिक अवसर मानिन्छ। तर शाहले भने विपद्का बेला देशको परिस्थितिलाई प्राथमिकता दिँदै भेटघाट सीमित गरेका छन्।

भोटेकोशी बाढीपछि शाहको न्युयोर्क भ्रमण नै अन्योलमा परेको थियो। भ्रमण रद्द गर्नेबारे समेत छलफल भएको थियो।

तर अन्ततः नेपालको विपद् र जलवायु संकटको विषय विश्व मञ्चमा उठाउनुपर्ने निष्कर्षसहित उनी न्युयोर्क जाने भएका हुन्।

अब चासो भाषणमा मात्रै छैन। महासभामा नेपालका दुःख र जलवायु संकटको कुरा गरेपछि त्यसलाई अन्तर्राष्ट्रिय सहयोगमा कसरी बदलिन्छ भन्ने प्रश्न पनि छ।

देशभित्र विपद्को असर गहिरिँदै गर्दा प्रधानमन्त्रीले विश्व मञ्चमा उठाउने विषय र त्यसबाट नेपालले पाउने परिणामलाई पनि अर्थपूर्ण रूपमा हेरिनेछ।

प्रधानमन्त्री शाहले विमानस्थलमा वर्षौँदेखि चल्दै आएको भीआईपी बिदाइको शैली पनि हटाएका छन्। मन्त्री, उच्चपदस्थ कर्मचारी, सुरक्षा निकायका प्रमुख तथा विदेशी कूटनीतिज्ञलाई समेत बिदाइका लागि विमानस्थल नबोलाइएको परराष्ट्र मन्त्रालयले जनाएको छ।

प्रधानमन्त्रीको सवारी भीआईपी लाउन्जबाट सिधै जहाज पार्किङस्थलसम्म पुग्ने व्यवस्था मिलाइएको छ।

शाहसँग मुख्य सल्लाहकार कुमार व्यञ्जनकार, प्रमुख शिष्टाचार अधिकारी कुमार खरेलसहित सीमित टोली मात्रै जानेछ।

परराष्ट्रमन्त्री शिशिर खनाल भने यसअघि नै न्युयोर्क पुगिसकेका छन्। उनी विभिन्न समकक्षीसँग भेटवार्तामा व्यस्त छन्।

बालेनको यो शैलीलाई समर्थकले सादगीका रूपमा हेर्छन्।  यद्यपि उनको यो शैलीले राज्यका स्थापित कूटनीतिक अभ्यास र प्रोटोकलको भने धज्जी उडाएको छ।