काठमाडौं । रास्वपाका सांसद राजीव खत्रीले जेन्जी आन्दोलनका दोषीलाई कानुनी कठघरामा उभ्याउन माग गरेका छन्। उनले जेन्जी आन्दोलन सचेत युवाहरूको विद्रोह थियो कि थिएन भन्ने विषयमा प्रतिनिधिसभाबाटै संकल्प प्रस्ताव पारित गर्नुपर्ने बताएका छन्।

प्रतिनिधिसभाको बैठकमा बोल्दै खत्रीले जेन्जी आन्दोलनमा ज्यान गुमाएका युवाका परिवारले न्यायको अनुभूति गर्न नसकेको भन्दै सरकार र संसद्को भूमिकामाथि प्रश्न उठाए।

उनले गत चैत १९ गतेको संसद् बैठक सम्झाउँदै रास्वपा सभापति रवि लामिछानेले ‘न्याय पाउने पहिलो हक सहिदकी आमाको हो’ भनेको स्मरण गरे।

तर संसद्को ५८औँ बैठकसम्म आइपुग्दा सहिदकी आमाले नै आफ्नो अपमान भएको भन्दै सदनमा रुनुपर्ने अवस्था आएको खत्रीको भनाइ थियो।

‘छोराको झोलामा कापी र किताब थियो, मुखमा भ्रष्टाचारविरोधी नारा थियो। छाती र टाउकोमा गोली हानियो। खुङ्खार आतंकवादीसरह मारियो,’ खत्रीले भने।

उनले सहिदका आमाबाबुको पीडा र आन्दोलनमा ज्यान गुमाएकाहरूको बलिदानलाई राजनीतिक विवादमा सीमित गर्न नहुने बताए।

‘सहिदको रगत र आमाको आँसुको हिसाबकिताब हुन्छ भनियो। तर छोराको लासमाथि पद साटेको होइन भन्दै सदनमा चित्कार छोड्नुपर्ने दिन आयो,’ उनले भने।

खत्रीले जेन्जी आन्दोलनको प्रकृतिबारे संसद्ले स्पष्ट धारणा बनाउनुपर्ने बताए।

‘जेन्जी आन्दोलन सचेत युवाहरूको विद्रोह हो या होइन ? हो भने यही सदनबाट संकल्प प्रस्ताव ल्याएर पास गरौँ,’ उनले भने।

आन्दोलनलाई विद्रोहका रूपमा स्वीकार गर्ने हो भने त्यस क्रममा भएका घटनाको छानबिन गरी दोषीलाई कानुनी कठघरामा उभ्याउनुपर्ने उनको माग छ।

‘दोषीलाई कठघरामा उभ्याएर जेन्जीलाई न्याय दिने संकल्प गरौँ। नत्र सहिदकी आमाको आँसुले अवश्य पोल्नेछ,’ खत्रीले भने।

उनले जेन्जी आन्दोलनमा ज्यान गुमाएका र घाइते भएका युवाको न्यायको प्रश्न संसद्ले गम्भीर रूपमा लिनुपर्नेमा जोड दिए।