काठमाडौं । रास्वपाका सांसद मनीष झाले जानकी मन्दिर क्षेत्रलाई संरक्षित स्मारक क्षेत्र घोषणा गर्ने मन्त्रिपरिषद्को निर्णयको स्वागत गरेका छन्।

प्रतिनिधिसभाको बुधबारको बैठकमा बोल्दै झाले चुनावी प्रतिबद्धताअनुसार जानकी मन्दिरलाई विश्व सम्पदा सूचीमा सूचीकृत गराउने प्रक्रिया अघि बढेको भन्दै सरकारप्रति आभार व्यक्त गरे।

गत वर्षको चुनावी अभियानका क्रममा जानकी मन्दिरलाई विश्व सम्पदा सूचीमा सूचीकृत गराउने प्रतिबद्धता जनाएको स्मरण गर्दै उनले संरक्षित स्मारक क्षेत्र घोषणा हुनु त्यसतर्फको महत्वपूर्ण कदम भएको बताए।

‘गत वर्ष चुनावी अभियानको सुरुवात गर्दा जानकी मन्दिरलाई विश्व सम्पदा सूचीमा सूचीकृत गराउने प्रतिबद्धता हामीले व्यक्त गरेका थियौँ। सोही प्रतिबद्धताअनुरूप मन्दिर क्षेत्रलाई संरक्षित क्षेत्रका रूपमा घोषणा गर्ने निर्णय भएकामा आभार व्यक्त गर्दछु,’ झाले भने।

झाले पछिल्लो समय सरकारी काममा देखिएको तदारुकताको पनि प्रशंसा गरे।

विशेषगरी बाढीका कारण अवरुद्ध कृष्णभीरको सडक १२ दिनमै सञ्चालनमा ल्याउन भौतिक पूर्वाधार तथा यातायात मन्त्रालयले देखाएको सक्रियता उनले सराहनीय भएको बताए।

सरकारले देखाएको यही गति अन्य विकास आयोजना र सार्वजनिक सेवामा पनि देखिनुपर्ने उनको भनाइ थियो।

सांसद झाले विभिन्न स्थानमा रहेका बाढीपीडितका अस्थायी शिविरको अवस्थाप्रति पनि संसद्को ध्यानाकर्षण गराए।

अस्थायी शिविरमा महिला र बालबालिकाको सुरक्षा संवेदनशीलता बढेको भन्दै उनले तत्काल प्रभावकारी सुरक्षा र व्यवस्थापनको व्यवस्था गर्न सरकारसँग माग गरे।

असुरक्षित वातावरणमा बस्न बाध्य पीडितहरू प्राकृतिक विपत्तिपछि थप समस्यामा पर्न सक्ने भन्दै उनले शिविरको व्यवस्थापनलाई प्राथमिकतामा राख्न आग्रह गरे।