काठमाडौं । नेकपा एमालेको केन्द्रीय कमिटी बैठक सुरु भएको छ । ललितपुरको भैंसेपाटीस्थित रामबाग महलमा जारी बैठकमा अध्यक्ष केपी शर्मा ओलीले सोमबार प्रस्तुत गरेको राजनीतिक प्रतिवेदनमाथि केन्द्रीय सदस्यहरूले धारणा राखिरहेका छन् ।

बैठकमा बोल्ने प्रत्येक केन्द्रीय सदस्यका लागि तीन मिनेटको समय निर्धारण गरिएको छ । सदस्यहरूले अध्यक्ष ओलीको राजनीतिक प्रतिवेदनमाथि आफ्नो धारणा राख्नुका साथै पछिल्लो राजनीतिक परिस्थितिबारे पनि विचार प्रस्तुत गर्नेछन् ।

सोमबारदेखि सुरु भएको बैठकमा अध्यक्ष ओलीले पार्टीको नेतृत्व निरन्तरता दिने संकेतसहित राजनीतिक प्रतिवेदन प्रस्तुत गरेका थिए । पार्टी पुनर्गठनसम्बन्धी बहस र उठाइएका प्रश्नमाथि प्रतिवेदनमार्फत आफ्नो धारणा राख्दै ओलीले पुनर्गठनको विषयलाई क्षणिक आवेग वा लहडका रूपमा नलिन आग्रह गरेका थिए ।