काठमाडौं । नेपाली कम्युनिस्ट पार्टीका प्रमुख सचेतक युवराज दुलालले त्रिपुरेश्वरमा भएको बस आगलागी घटनाको छानबिन गर्न सरकारसँग माग गरेका छन्।

प्रतिनिधिसभाको बैठकमा बोल्दै दुलालले बसमा आगलागी हुने अवस्था कसरी सिर्जना भयो भन्ने विषयमा गम्भीर छानबिन आवश्यक रहेको बताएका हुन्।

उनले घटनाका क्रममा राज्यको भूमिकामाथि समेत प्रश्न उठाए। दुलालले ‘म लाश हुँदैछु’ भनेर पीडितले जानकारी गराउँदा पनि राज्यले समयमै संवेदनशीलता नदेखाएको आरोप लगाए।

‘म लाश हुँदैछु भन्दै गर्दा राज्यले सुन्यो तर विवेक गुमायो, समवेदना गुमायो र यो उद्घोष गर्ने युवा मर्छ कि मर्दैन भनेर कुरेर बसिरह्यो,’ उनले भने।

दुलालले राज्यकै कारण पीडितले ज्यान गुमाउनुपरेको दाबी गर्दै सरकार अब घटनाप्रति कसरी प्रस्तुत हुन्छ भन्ने प्रश्नसमेत गरे।

‘राज्यकै कारण उनले जीवन गुमाउनुपर्यो। सरकार अब के गर्छ? हेरेर मात्रै बस्ने हो कि या सरकारले समवेदना सुन्ने हो?,’ उनले प्रश्न गरे।

उनले घटनाको वास्तविक कारण पहिचान गरी दोषी देखिए कारबाही गर्नुपर्नेमा जोड दिए।