मनाङ। हिम्लुङ हिमालमा आइतबार गएको हिमपहिरोमा परी सम्पर्कविहीन भएकाहरूको खोजी सोमबार बिहानैदेखि तीव्र पारिएको छ।

सम्भावित क्षेत्रमा हेलिकप्टरबाट निगरानी गर्नुका साथै उद्धार टोली घटनास्थलमै पुगेर खोज तथा उद्धारमा जुटेको छ।

हिमपहिरोमा १० जना सम्पर्कविहीन भएको प्रारम्भिक जानकारी आए पनि यकिन संख्या अझै पुष्टि हुन सकेको छैन। मनाङ प्रशासनले घटनाको विस्तृत विवरण संकलन गर्दै सम्पर्कविहीनहरूको अवस्था पत्ता लगाउने प्रयास भइरहेको जनाएको छ।

आइतबार उद्धार गरिएका दुई जनाको शव चामे ल्याइएको थियो। मनाङका सहायक प्रमुख जिल्ला अधिकारी कृष्णप्रसाद पौडेलका अनुसार ती दुवै शव काठमाडौं ल्याएर शिक्षण अस्पताल महाराजगञ्जमा राखिएको छ।

सम्पर्कविहीनहरूको खोजी तथा उद्धारका लागि सुरक्षाकर्मी र सम्बन्धित उद्धार टोली परिचालन गरिएको प्रशासनले जनाएको छ।

दुर्गम क्षेत्रमा हिमपहिरो गएको र मौसमको अवस्थाले समेत उद्धारमा चुनौती थपिएको बताइएको छ।