काठमाडौं । श्रम संस्कृति पार्टीका सांसद ध्रुवराज राईले प्रधानमन्त्री बालेन्द्र शाहसँग सांसदहरूको प्रश्नोत्तर कार्यक्रम लामो समयदेखि हुन नसकेको भन्दै सभामुख डोलप्रसाद अर्यालसँग जवाफ मागेका छन्।

प्रतिनिधिसभाको सोमबारको बैठकमा बोल्दै सांसद राईले प्रधानमन्त्रीसँग प्रत्यक्ष प्रश्नोत्तरका लागि भदौ १० गते तोकिएको मिति बितिसक्दा पनि कार्यक्रम हुन नसकेकोप्रति असन्तुष्टि जनाए। उनले निर्धारित मितिको एक महिना दुई दिन बितिसक्दा पनि प्रश्नोत्तर कार्यक्रम हुन नसकेको भन्दै अब कहिले सञ्चालन हुने हो भन्ने प्रश्न गरे।

‘प्रधानमन्त्रीसँग प्रश्नोत्तर गर्ने दिन भदौ १० गते तोकिएको थियो। तर, एक महिना दुई दिन भइसक्यो, त्यो दिन अझै आएको छैन,’ राईले भने, ‘सरकारले अब केटाकेटी खेल खेल्न छोड्नुपर्छ।’

उनले पछिल्लो समय भइरहेको पक्राउ तथा रिहाइको प्रक्रियामाथि पनि प्रश्न उठाए। घटनाको गम्भीरता र त्यससँग सम्बन्धित तथ्य नहेरी हचुवाका भरमा पक्राउ गर्ने र त्यसको भोलिपल्टै रिहा गर्ने सरकारी कार्यशैली उचित नभएको उनको भनाइ थियो।

‘विषय कति गम्भीर हो भन्ने कुराको ख्याल गरेर मात्रै पक्राउ गरिनुपर्छ। पक्राउ गर्ने र भोलिपल्टै छोड्ने काम कत्तिको उपयुक्त हो ?’ उनले प्रश्न गरे।

राईले आफूहरू प्रतिपक्षमा रहे पनि राष्ट्रिय मुद्दा तथा विकास निर्माणका विषयमा सरकारलाई सहयोग गर्दै आएको बताए। तर, सरकारको गैरजिम्मेवार कार्यशैलीका कारण प्रतिपक्षी दलका सांसदहरूलाई समेत आफ्नो भूमिका निर्वाह गर्न कठिन भइरहेको उनको भनाइ थियो।

‘हामी प्रतिपक्षी भए पनि सरकारलाई साथ दिने गरिरहेका छौँ, तर सरकारको गैरजिम्मेवारपनले काम गर्न कठिन भइरहेको छ,’ उनले भने।