काठमाडौं । सत्तारुढ राष्ट्रिय स्वतन्त्र पार्टी (रास्वपा) का सांसद जगदिश खरेलले ‘प्रधानमन्त्री दैवी प्रकोप उद्धार कोष’को नाम परिवर्तन गरी ‘प्रधानमन्त्री विपद् राहत कोष’ राख्न आग्रह गरेका छन् ।

प्रतिनिधिसभाको बैठकमा बोल्दै ललितपुरबाट निर्वाचित सांसद खरेलले विपद्लाई दैवीप्रकोपका रूपमा बुझ्न नहुने भन्दै कोषको नाम परिवर्तन गर्न प्रधानमन्त्री वालेन्द्र शाहसँग आग्रह गरेका हुन् ।

उनले यसअघि पनि संसद्को यही सदनबाट प्रधानमन्त्रीलाई कोषको नाम परिवर्तन गर्न आग्रह गरेको स्मरण गराउँदै त्यसबारे प्रधानमन्त्रीको जवाफको पर्खाइमा रहेको बताए ।

‘विपद् दैवीप्रकोप होइन । यो दैवले गराएको होइन । यो प्राकृतिक या मानव सिर्जित हुन्छ,’ खरेलले भने ।

उनले ‘प्रधानमन्त्री दैवी प्रकोप उद्धार कोष’को सट्टा ‘प्रधानमन्त्री विपद् राहत कोष’ नामकरण गर्नुपर्ने आफ्नो माग दोहोर्‍याए । ‘यही सदनबाट सम्माननीय प्रधानमन्त्रीज्युलाई मैले आग्रह गरेको थिएँ,’ उनले भने, ‘प्रधानमन्त्री दैवी प्रकोप उद्धार कोष होइन, प्रधानमन्त्री विपद् राहत कोष भनेर नामकरण गरियोस् भनेर भनेको थिएँ । त्यसको जवाफको पर्खाइमा म रहेको छु । म यो अनुरोध गर्न चाहन्छु ।’