काठमाडौं । शुक्रबारदेखि प्रदर्शनमा आएको चलचित्र ‘बाः एक योद्धा’ले पाँचौँ दिनसम्म आइपुग्दा दर्शकको साथ बढाउँदै लगेको छ। प्रदर्शनका सुरुवाती तीन दिन लगातार वर्षा हुँदा अपेक्षाकृत कम दर्शक पाएको चलचित्रले मंगलबारदेखि भने हलमा दर्शकको चाप बढाएको हो।

मंगलबारदेखि लागू भएको ‘डिल डे’अन्तर्गत ५० प्रतिशत छुटको प्रभावले पनि चलचित्रको व्यापारमा सकारात्मक प्रभाव परेको निर्माण तथा वितरण पक्षले जनाएको छ। मंगलबार देशभर ७९ शो पाएको चलचित्रका अधिकांश शोमा उल्लेख्य दर्शक उपस्थित भएको र केही शो हाउसफुलसमेत भएको वितरकको भनाइ छ।

दर्शकको माग बढेसँगै बुधबार चलचित्रको शो संख्या पनि वृद्धि गरिएको छ। वितरकका अनुसार बुधबार देशभर ‘बाः एक योद्धा’ले १ सयभन्दा बढी शो पाएको छ। दर्शकको मागअनुसार विभिन्न हलले थप शोसमेत थपिरहेका छन्। काठमाडौं उपत्यकाका मल्टिप्लेक्सदेखि मोफसलका हलसम्म चलचित्रप्रति दर्शकको चासो बढ्दै गएको निर्माण पक्षले जनाएको छ।

चलचित्रप्रति दर्शकको प्रतिक्रियामा यसको भावनात्मक पक्षलाई प्राथमिकता दिइएको देखिन्छ। चलचित्र हेरेका दर्शकले ‘बाः एक योद्धा’ले आफूहरूलाई भावुक बनाएको, रुवाएको तथा आफ्नै परिवार, आफन्त वा छिमेकीले भोगेको जस्तो कथा प्रस्तुत गरेको प्रतिक्रिया दिएका छन्।

विशेषगरी सन्तानका लागि बाबुआमाले गर्ने त्याग र संघर्षलाई चलचित्रले प्रस्तुत गरेको भन्दै दर्शकले प्रशंसा गरेका छन्। केही दर्शकले चलचित्र हेरेपछि आफ्ना बाबुआमाको सम्झना आएको तथा आफ्ना सन्तानलाई पनि यस्तो चलचित्र देखाउनुपर्ने प्रतिक्रिया दिएका छन्।

सन्तानले आफ्ना अधिकारका विषयमा आवाज उठाए पनि बाबुआमाप्रतिको दायित्व बिर्सन नहुने सन्देश चलचित्रले दिएको दर्शकको भनाइ छ। वृद्ध अवस्थामा आमाबाबुले सन्तानबाट भोग्नुपर्ने उपेक्षा तथा उनीहरूले जीवनभर गरेको त्यागलाई चलचित्रले भावनात्मक रूपमा प्रस्तुत गरेको प्रतिक्रिया दर्शकबाट आएको छ।

प्रदर्शनको सुरुवाती दिनदेखि नै विभिन्न हलमा पुगेर दर्शकसँग साक्षात्कार गर्दै आएको कलाकार टोलीले पछिल्ला दिनमा बढेको दर्शकको उपस्थितिले आफूहरूलाई थप उत्साहित बनाएको जनाएको छ। कलाकारहरूले हलमै पुगेर दर्शकसँग चलचित्रबारे प्रतिक्रिया लिइरहेका छन्।

सन्तानको भविष्यका लागि बाबुले गर्ने त्याग, संघर्ष र जीवनभर सामना गर्ने चुनौती चलचित्रको मुख्य कथावस्तु हो। सन्तानका इच्छा पूरा गर्न आमाबाबुले गर्ने संघर्षदेखि वृद्ध अवस्थामा उनीहरूले भोग्ने उपेक्षा र दुःखसम्मका विषयलाई चलचित्रले कथाको केन्द्रमा राखेको छ।

चलचित्रमा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापालगायतका कलाकारको अभिनय रहेको छ।

हरि लम्सालको लेखन तथा निर्देशनमा बनेको ‘बाः एक योद्धा’ आर्टिस्टिक इन्टरटेनमेन्टको ब्यानरमा निर्माण भएको हो। चलचित्रको कथा तथा पटकथा पनि लम्सालकै रहेको छ।

वसन्त लम्साल निर्माता रहेको चलचित्रमा अनिल बुढाथोकी कार्यकारी निर्माता, अर्जुन पौडेल लाइन प्रोड्युसर तथा कृष्ण काफ्ले सह-निर्माता छन्।