काठमाडौं। अभिनेता अनमोल केसी अभिनीत चलचित्र ‘बाटुलो जून’ आगामी कार्तिक २६ गतेदेखि प्रदर्शनमा आउने भएको छ।

सनराइज पिक्चरले चलचित्रको टिजर सार्वजनिक गर्दै प्रदर्शन मिति घोषणा गरेको हो। टिजरमा चलचित्रको कथा पूरै खुलाइएको छैन। बरु पात्र, परिवेश र कथाको केही झलक मात्रै देखाइएको छ।

चलचित्रको टिजरले ३० को दशकको प्रेमकथातर्फ संकेत गर्छ। त्यतिबेलाको सामाजिक परिवेश, जीवनशैली र प्रेम गर्ने शैलीलाई कथाको केन्द्रमा राखिएको निर्माण पक्षले जनाएको छ।

आजको प्रविधिमैत्री समय र तीव्र गतिमा बदलिएको प्रेमभन्दा फरक, पुरानो पुस्ताको प्रेम कस्तो थियो भन्ने भाव चलचित्रमा प्रस्तुत गरिएको छ। आदर्श प्रेमकथामार्फत तत्कालीन समाज र जीवनशैलीलाई पर्दामा उतार्ने प्रयास गरिएको निर्माण पक्षको भनाइ छ।

‘बाटुलो जून’ अभिनेता भुवन केसीले निर्देशन गरेका हुन्। चलचित्रमा अनमोल केसी, भुवन केसी र प्रिन्सी खतिवडाको मुख्य भूमिका छ। बेल्जियममा बस्दै आएकी अभिनेत्री गरिमा पन्तले पनि यही चलचित्रमार्फत अभिनयमा पुनरागमन गरेकी छन्।

चलचित्रको कथा सामीप्यराज तिमल्सेना र सरिन पोखरेलले लेखेका हुन्। राजेश श्रेष्ठको छायांकन, कृष्ण भण्डारीको सम्पादन तथा रोमन बज्राचार्यको पार्श्व संगीत रहेको छ। प्रदीप श्रेष्ठ एसोसिएट निर्देशकका रूपमा छन्।

‘बाटुलो जून’लाई जिया केसी र भविष्य खड्काले निर्माण गरेका हुन् भने विवेक थापा सहनिर्माताका रूपमा रहेका छन्।

३० को दशकको प्रेम, त्यतिबेलाको समाज र बदलिँदो समयसँगै प्रेमको स्वरूपमा आएको परिवर्तनलाई कथामा जोडिएको चलचित्रले अनमोलको अघिल्ला फिल्मभन्दा फरक स्वाद दिने अपेक्षा निर्माण पक्षको छ।