काठमाडौं । नेपाली कांग्रेसको १५औँ महाधिवेशनमा उपसभापति र महामन्त्री पदको खुलातर्फ डा. चन्द्रकान्त भण्डारी र प्रदीप पौडेलले अग्रता कायम गरेका छन्। ४ हजार १०० मत गणनाको विवरणअनुसार भण्डारीले उपसभापतिमा २ हजार ४५ र पौडेलले महामन्त्रीमा २ हजार ३९१ मत प्राप्त गरेका छन्।

उपसभापतिको खुलातर्फ भण्डारीका निकटतम प्रतिस्पर्धी ई. मधु आचार्यले १ हजार २७८ मत पाएका छन्। गोविन्द भट्टराईले १ हजार ९१, सुरेन्द्रराज पाण्डेले १ हजार ६५ र धनराज गुरुङले ९०८ मत प्राप्त गरेका छन्। दीपक गिरीले ५७९ र प्रा.डा. चन्द्रमोहन यादवले ३३५ मत पाएका छन्।

महामन्त्रीको खुलातर्फ पौडेलपछि उदयशमशेर राणाले १ हजार ३३३ र डा. सुनिलकुमार शर्माले १ हजार १७५ मत प्राप्त गरेका छन्। अमरसिंह पुन मगरले ८८७, गुरुराज घिमिरेले ८२३ र नैनसिंह महरले ५३९ मत पाएका छन्। शंकर तिवारी र डा. सन्तोष उपाध्यायले क्रमशः ७१ र ५७ मत प्राप्त गरेका छन्।

महिला महामन्त्रीमा डा. डिला संग्रौला (पन्त) ले १ हजार ८१६ मतसहित अग्रता लिएकी छन्। महालक्ष्मी उपाध्याय (डिना) ले १ हजार ६३१ र रीता खनालले ४२० मत प्राप्त गरेकी छन्।

उपसभापतिको समावेशीतर्फ बिनोदकुमार चौधरीले १ हजार २६, जीवन परियारले ९७९, सीता गुरुङले ६७६, फरमुल्लाह मंसुरले ५६५ र रंजीत कर्णले ३११ मत पाएका छन्।

मतगणना जारी रहेकाले यी परिणाम अन्तिम भने होइनन्।