काठमाडौ । विवादास्पद अडियो प्रकरणमा मुछिएका राष्ट्रिय स्वतन्त्र पार्टी (रास्वपा)का सांसद खगेन्द्र सुनारसँग पार्टीले २४ घण्टाभित्र स्पष्टीकरण मागेको छ।

बागमती प्रदेशकी पूर्वराज्यमन्त्री रहेकी एक महिलाप्रति सुनारले आपत्तिजनक लाञ्छना लगाउनुका साथै धम्कीपूर्ण भाषा प्रयोग गरेको भनिएको अडियो सार्वजनिक भएपछि पार्टीले आन्तरिक छानबिन प्रक्रिया अघि बढाएको हो।

यस्तै, पार्टीको केन्द्रीय अनुशासन आयोगले सामाजिक सञ्जालमा सार्वजनिक भएको विषयमा सुनारलाई २४ घण्टाभित्र स्पष्टीकरण दिन पत्र पठाएको आयोगका एक सदस्यले जानकारी दिएका छन्।

‘माननीय खगेन्द्र सुनारलाई सामाजिक सञ्जालमा सार्वजनिक भएको विषयमा २४ घण्टाभित्र स्पष्टीकरण दिन पत्र पठाएका छौँ। उहाँको स्पष्टीकरण आएपछि बाँकी प्रक्रिया अगाडि बढ्छ,’ आयोगले  भनेको छ।

यसअघि पार्टीका महामन्त्री विपिनकुमार आचार्यले घटनाको सत्यतथ्य पत्ता लगाउन केन्द्रीय अनुशासन आयोगलाई तत्काल आन्तरिक छानबिन प्रक्रिया अघि बढाउन निर्देशन दिइएको जानकारी दिएका थिए।

अडियो प्रकरण सार्वजनिक भएपछि रास्वपाले सुनारलाई सार्वजनिक कार्यक्रममा सहभागी हुनसमेत रोक लगाएको छ। साथै, पार्टीका केन्द्रीय सदस्यसमेत रहेका सुनारमाथि घटनाको निष्पक्ष छानबिन गरी आवश्यक कारबाही गर्न चौतर्फी दबाब बढिरहेको छ।