काठमाडौं । राष्ट्रिय स्वतन्त्र पार्टी (रास्वपा) का सांसद खगेन्द्र सुनार पार्टीको निर्देशनपछि काठमाडौं फर्किएका छन्।

कार्यक्रमका लागि दाङ पुगेका उनी मंगलबार नेपालगञ्ज हुँदै राजधानी आएको रास्वपा दाङका सभापति किरण खनालले जानकारी दिएका छन्।

खनालका अनुसार सुनारको पार्टी कार्यालयसँग सम्बन्धित कार्यक्रममा सहभागिता जनाउने योजना थियो। तर, पार्टीबाट फर्किन निर्देशन आएपछि उनी निर्धारित कार्यक्रममा सहभागी नभई काठमाडौं फर्किएका हुन्।

बागमती प्रदेशकी पूर्वस्वास्थ्य राज्यमन्त्रीसँग जोडिएको भनिएको अश्लील अडियो सार्वजनिक भएपछि रास्वपाले सुनारलाई सांसदको हैसियतमा सार्वजनिक कार्यक्रममा सहभागी नहुन निर्देशन दिएको थियो।

अडियो सार्वजनिक भएसँगै सुनारको अभिव्यक्तिलाई लिएर विवाद चर्किएको छ।