काठमाडौं । दशैं नजिकिँदै गर्दा खसीबजारमा ग्राहकको भीड लाग्नुपर्ने हो। तर, यस वर्ष काठमाडौंको कलंकीस्थित खसीबजारमा विगतका वर्षको जस्तो चहलपहल देखिएको छैन।

खसीबोका किन्ने ग्राहक अपेक्षाअनुसार नआएपछि व्यापारीहरू निराश बनेका छन्।

कलंकी खसीबजारमा विगत ८ देखि ९ वर्षदेखि व्यापार गर्दै आएका चितवनका रामहरि थापा क्षेत्रीका अनुसार यसपालि बजारमा ग्राहकको उपस्थिति निकै कम छ। खसीबोकाको आपूर्तिमा खासै समस्या नरहे पनि गत वर्षको तुलनामा मूल्य बढेको उनले बताए।

थापा क्षेत्रीका अनुसार कलंकीमा दाङ, सल्यान, सुर्खेत, कालीकोट, बैतडी, डोटी र उदयपुरलगायत जिल्लाबाट खसीबोका ल्याउने गरिन्छ। विभिन्न जिल्लाबाट खसीबोका बजारमा भित्रिए पनि खरिद गर्ने ग्राहकको संख्या भने अघिल्ला वर्षको तुलनामा कम देखिएको छ।

व्यापारीहरूका अनुसार अहिले कलंकी खसीबजारमा खसीको मूल्य प्रतिकिलो ७८० देखि ८६० रुपैयाँसम्म छ। गत वर्षभन्दा मूल्य बढेपछि उपभोक्तालाई दशैंका लागि खसी किन्न थप रकम खर्च गर्नुपर्ने भएको छ।

दशैंमा मासुको खपत बढ्ने र खसीबजारमा किनमेल गर्नेको भीड लाग्ने परम्परा भए पनि यस वर्ष बजारको अवस्था अपेक्षाभन्दा फरक देखिएको छ। खसीबोका बिक्रीका लागि तयार राखेका व्यापारी ग्राहकको पर्खाइमा छन्।

दशैं आउन अझै केही दिन बाँकी रहेकाले आगामी दिनमा ग्राहकको चहलपहल बढ्ने र व्यापारले गति लिने आशा व्यापारीहरूले गरेका छन्।