काठमाडाैं । दसैँको आगमनसँगै बाँकेको नेपालगन्ज सहर दुर्गा भगवतीका मूर्तिले झकिझकाउ बनेको छ। सहरका चोक, गल्ली र चौराहमा स्थापना गरिएका दुर्गा मूर्तिमा बिहानैदेखि रातिसम्म पूजाआजा तथा भजनकीर्तन भइरहेका छन्। मूर्ति स्थापना गरिएका स्थानमा भक्तजनको चहलपहल बढेसँगै सहरमा दसैँको रौनक छाएको छ।

नेपालगन्जका अधिकांश चोक र गल्लीमा दुर्गा मूर्ति स्थापना गरिएको छ। कतिपय टोलमा दुईदेखि तीनवटासम्म मूर्ति राखिएका छन्। पछिल्ला वर्षमा दसैँका बेला दुर्गा भगवतीका मूर्ति स्थापना गरी पूजाआजा गर्ने प्रचलन बढ्दै गएको छ।

घटस्थापनाका दिन स्थापना गरिएका दुर्गा मूर्तिको आँखामा लगाइएको पट्टी सप्तमीका दिन खोल्ने परम्परा छ। धार्मिक मान्यताअनुसार दुर्गा भवानीले सप्तमीका दिन महिषासुर राक्षसको वध गरेको विश्वास गरिएकाले सोही दिन मूर्तिको आँखा खोल्ने चलन रहेको छ।

दसैँभरि भव्य पूजाआजा र दर्शनपछि विजयादशमीको भोलिपल्ट अर्थात् एकादशीका दिन दुर्गा मूर्तिहरूलाई नजिकैको राप्ती नदीमा लगेर विधिपूर्वक विसर्जन गरिन्छ। घटस्थापनादेखि नै भक्तजन राति अबेरसम्म जाग्राम बसेर दुर्गा भगवतीको पूजा आराधना गर्ने गर्छन्। दुर्गा मूर्ति स्थापना भएसँगै नेपालगन्जका चोक र गल्लीमा दसैँको उल्लास थपिएको छ।

घटस्थापनादेखि नै सहरका गल्ली, चोक, मन्दिर र चौराह भजनकीर्तनमय बनेका छन्। बिहानैदेखि अबेर रातिसम्म हुने भजनकीर्तनमा साना बालबालिकादेखि वृद्धवृद्धासम्म सहभागी हुने गरेका छन्। पूजाआजा र भजनकीर्तनका लागि चोकचोकमा भक्तजनको भीड लाग्ने गरेको छ।

नेपालगन्जका विभिन्न स्थानमा करिब चार सयको हाराहारीमा दुर्गा मूर्ति स्थापना गरिएको अनुमान छ। मूर्ति स्थापना भएसँगै बजारका चोकचोकमा राति अबेरसम्म चहलपहल बढ्ने गरेको छ। यस अवधिमा रामलीला हेर्न जाने परम्पराले समेत सहरको दसैँको रौनक थप्ने गरेको छ।

नेपालगन्जसँगै नरैनापुर,डुडुवा,खजुरा र कोहलपुरका विभिन्न गाउँमा पनि दुर्गा पूजाको चहलपहल बढेको छ। ती क्षेत्रका विभिन्न स्थानमा बिहानैदेखि रातिसम्म पूजाआजा तथा भजनकीर्तन भइरहेको छ।

नेपालगन्जका मुख्य सडक,चोक तथा गल्लीमा स्थापना गरिएका दुर्गा मूर्तिको सुरक्षाका लागि प्रहरी परिचालन गरिएको छ। साथै, दसैँका बेला मूर्ति स्थापना गरिएका स्थानमा भक्तजनको चहलपहल बढ्ने भएकाले सुरक्षा व्यवस्थासमेत मिलाइएको छ।