काठमाडौं। राष्ट्रिय स्वतन्त्र पार्टी (रास्वपा) का सांसद खगेन्द्र सुनारसँग जोडिएको एक महिलासँगको फोन संवादको अडिओ सार्वजनिक चर्चामा आएपछि उनीमाथि विगतमा भएको भनिएको हिंसाका घटनाबारे पनि प्रश्न उठ्न थालेका छन्।

उक्त संवादमा सुनिने कुराकानी र महिलामाथि भएको भनिएको व्यवहारलाई लिएर विभिन्न दाबी सार्वजनिक भइरहेका छन्।

प्राप्त विवरणअनुसार, सुनारको ती महिलासँग विवाहेत्तर सम्बन्ध रहेको बताइएको छ। ती महिला नेपाली कांग्रेसबाट बागमती प्रदेशसभा सदस्य बनेकी थिइन् र तत्कालीन प्रदेश सरकारमा स्वास्थ्य राज्यमन्त्रीको जिम्मेवारीसमेत सम्हालेकी थिइन्। नुवाकोटको पञ्चकन्या गाउँपालिकाकी स्थायी बासिन्दा उनी अहिले छोरासहित अमेरिका जाने तयारीमा रहेको बताइएको छ।

अडिओमा सुनिएको आवाज आफ्नो नभएको भन्दै ती महिलाले दाबी गर्दै आएको स्रोतहरूको भनाइ छ। तर, घटनाबारे जानकार व्यक्तिहरूले भने उनी र सुनारबीचको सम्बन्ध तथा विगतका विवादलाई जोडेर फरक विवरण दिएका छन्।

स्रोतका अनुसार, ती महिलाको विवाह आफ्नै भिनाजुसँग भएको थियो। दिदीसँगको पारिवारिक सम्बन्धमा जटिलता आएपछि गाउँमा बस्न कठिन भएको भन्दै उनी काठमाडौंमा बस्न थालेकी थिइन्। नेपाली कांग्रेसका नेता प्रकाशशरण महत र उनी एउटै गाउँका बासिन्दा रहेको बताइएको छ। महतको सहयोगमा उनले एक गैरसरकारी संस्थामा जागिर पाएको र २०७४ सालको प्रदेशसभा निर्वाचनमा समानुपातिक उम्मेदवारको बन्दसूचीमा परेर प्रदेशसभा सदस्य बनेको विवरण स्रोतले दिएको छ।

२०७८ कात्तिक ११ गते तत्कालीन नेकपा (एकीकृत समाजवादी) का उपाध्यक्ष राजेन्द्र पाण्डे बागमती प्रदेशको मुख्यमन्त्री नियुक्त भएका थिए। त्यसपछि पुस ९ गते मन्त्रिपरिषद् विस्तार हुँदा ती महिला स्वास्थ्य राज्यमन्त्री बनेकी थिइन्। स्रोतका अनुसार, त्यसअघि नै उनी र सुनारबीच निकट सम्बन्ध थियो।

२०७८ पुस ९ गते राज्यमन्त्री नियुक्त भएपछि ती महिलाले काठमाडौंको सीतापाइलास्थित शरणपुरमा फ्ल्याट भाडामा लिएर बसेकी थिइन्। शपथग्रहणपछि काठमाडौं फर्किएकी उनी बस्ने फ्ल्याटमा सुनार पुगेको र लेनदेनसम्बन्धी विवादका क्रममा कुटपिट भएको प्रहरी स्रोतलाई उद्धृत गर्दै बताइएको छ।

उक्त घटनामा महिलाको शरीरका संवेदनशील अङ्गमा चोट लागेको देखेपछि सुरक्षार्थ खटिएकी महिला प्रहरी अधिकृतले प्रहरी प्रधान कार्यालयको सुरक्षा सेवा निर्देशनालयमा जानकारी गराएको विवरणमा उल्लेख छ। त्यसपछि जिल्ला प्रहरी परिसर काठमाडौंका तत्कालीन प्रमुख एसएसपी सुदीप गिरीले प्रहरी वृत्त स्वयम्भूलाई घटनामा संलग्न भनिएका व्यक्तिलाई नियन्त्रणमा लिन निर्देशन दिएको बताइएको छ।

तत्कालीन डीएसपी मिलन केसीको नेतृत्वमा प्रहरी टोली शरणपुरस्थित निवास पुगेको र सुनारलाई पक्राउ गरेको स्रोतको भनाइ छ। पक्राउका क्रममा सुनारले आफूलाई दलित अभियन्ता तथा पत्रकारका रूपमा परिचय दिएको पनि विवरणमा उल्लेख छ।

प्रहरी हिरासतमा रहेका बेला सुनार चिसोले कठ्याङ्ग्रिएको र केही समयपछि घाइते अवस्थामा ती महिला पनि प्रहरी कार्यालय पुगेको स्रोतले जनाएको छ। उनले सुनारलाई आफ्नो जिम्मा लगाएर छाडिदिन आग्रह गरे पनि प्रहरीले तत्काल रिहा गर्न नमानेको बताइएको छ। त्यसपछि महिलाले सुनारका लागि न्यानो कपडाको व्यवस्था गरेको विवरणसमेत सार्वजनिक भएको छ।

प्रहरी स्रोतका अनुसार, पक्राउ परेको भोलिपल्ट दुवै पक्षबीच मिलापत्रसम्बन्धी कागज तयार गरी सुनारलाई छाडिएको थियो।

सीतापाइलाको घटनापछि चितवनको सौराहामा पनि सुनारले ती महिलामाथि कुटपिट गरेको आरोप लगाइएको छ। कुटपिटपछि उनको अनुहार सुन्निएको र उनी करिब एक सातासम्म मन्त्रालय नगएको स्रोतको दाबी छ।