काठमाडौं। चालु आर्थिक वर्ष २०८३/८४ को पहिलो दुई महिनामा नेपालमा ४ खर्ब ३६ अर्ब ३६ करोड रुपैयाँ रेमिट्यान्स भित्रिएको छ। साउन र भदौमा वैदेशिक रोजगारीमा रहेका नेपालीले पठाएको रकम अघिल्लो आर्थिक वर्षको सोही अवधिको तुलनामा २३.९ प्रतिशतले बढेको नेपाल राष्ट्र बैंकले जनाएको छ।

अघिल्लो आर्थिक वर्षको पहिलो दुई महिनामा रेमिट्यान्स आप्रवाह ३३.१ प्रतिशतले बढेको थियो। यस वर्ष रकम भित्रिने क्रम बढे पनि वृद्धिदर भने अघिल्लो वर्षको तुलनामा कम देखिएको छ।

राष्ट्र बैंकका अनुसार २०८३ भदौमा मात्रै २ खर्ब २१ अर्ब ३१ करोड रुपैयाँ रेमिट्यान्स भित्रिएको छ। अघिल्लो वर्षको सोही महिनामा १ खर्ब ७४ अर्ब ६७ करोड रुपैयाँ रेमिट्यान्स आएको थियो।

अमेरिकी डलरमा गणना गर्दा समीक्षा अवधिमा रेमिट्यान्स आप्रवाह १३.५ प्रतिशतले बढेर २ अर्ब ८५ करोड डलर पुगेको छ। अघिल्लो वर्षको सोही अवधिमा यस्तो वृद्धिदर २७.६ प्रतिशत थियो।

यस अवधिमा खुद द्वितीय आय अर्थात् खुद ट्रान्सफर ४ खर्ब ६९ अर्ब ४४ करोड रुपैयाँ पुगेको छ। अघिल्लो आर्थिक वर्षको सोही अवधिमा यस्तो आय ३ खर्ब ८४ अर्ब ८८ करोड रुपैयाँ रहेको थियो।

रेमिट्यान्स बढिरहँदा वैदेशिक रोजगारीका लागि नयाँ श्रम स्वीकृति लिने नेपालीको सङ्ख्या भने घटेको छ। राष्ट्र बैंकका अनुसार समीक्षा अवधिमा संस्थागत तथा व्यक्तिगत रूपमा नयाँ अन्तिम श्रम स्वीकृति लिनेको सङ्ख्या ७८ हजार ३२० रहेको छ। अघिल्लो वर्षको सोही अवधिमा यस्तो सङ्ख्या ९० हजार १९८ थियो।

त्यस्तै, पुनः श्रम स्वीकृति लिने नेपालीको सङ्ख्या भने बढेर ५२ हजार १६३ पुगेको छ। अघिल्लो आर्थिक वर्षको पहिलो दुई महिनामा पुनः श्रम स्वीकृति लिनेको सङ्ख्या ४५ हजार ८८४ रहेको थियो।