युक्रेन वास्तविक सहयोगी हो भनेर नाटोले व्यवहार गर्नुपर्छ : राष्ट्रपति जेलेन्स्की
युक्रेनका राष्ट्रपति भोलोदिमिर जेलेन्स्कीले आफ्नो सङ्घर्षरत सेनालाई सहयोग गर्न हतियार आपूर्तिमा तीव्रता दिएर उत्तर एटलान्टिक सन्धि सङ्गठन (नाटो) ले युक्रेनको साँच्चिकै सहयोगी हो कि होइन भन्ने छनौट गर्नुपर्ने बताउनुभएको छ ।
नेटोका रक्षामन्त्रीहरूसँगको भिडियो कन्फरेन्समा जेलेन्स्कीले भन्नुभयो, “हाम्रो आकाश फेरि सुरक्षित हुनुपर्छ ।
यो पूर्ण रूपमा तपाईंको छनौटमा निर्भर गर्दछ । जीवन वास्तवमा सबै ठाउँमा समान मूल्यवान छ कि छैन छनौट गर्नुहोस् । तपाईंसँग सबै साझेदारहरूको समान मनोवृत्ति छ कि छैन छनौट गर्नुहोस् । हामी वास्तवमै सहयोगी हौं कि होइनौं भन्ने निर्णय गर्नुहोस् ।” जेलेन्स्कीले जमिन र हावाबाट रूसी आक्रमण रोक्न सक्ने आफ्नो सेनाको क्षमताको निराशाजनक तस्वीर प्रस्तुत गर्दै युक्रेनले पश्चिमी सहयोगबिना आफ्नो प्रतिरक्षा गर्न नसक्ने बताउनुभयो ।
उहाँले भन्नुभयो, “यो स्पष्ट छ रूससँग हवाई आक्रमणका लागि शक्ति छ । यसको आक्रमण अब ड्रोन र रकेटमा निर्भर हुन सक्छ, दुर्भाग्यवश, जमीनमा हाम्रो क्षमता सीमित छ ।” जेलेन्स्कीले अमेरिकी तल्लो सदन ‘हाउस अफ रिप्रेजेन्टेटिभ्स’मा ६१ अर्ब अमेरिकी डलरको सैन्य सहायता प्याकेजलाई खोलिदिने वा नखोलिदिने भन्ने विषयमा शनिबार भएको मतदानलाई ‘अत्यन्त महत्वपूर्ण निर्णय’ भन्नुभयो ।
रिपब्लिकन पार्टीमा देखिएको राजनीतिक विवादका कारण गत वर्षदेखि नै सहायता वितरणमा ढिलाइ भइरहेको छ ।रूसी हवाई आक्रमणका कारण दर्जनौँको मृत्यु हुनुका साथै घाइते भएपछि युक्रेनी नेताले युक्रेनी शहरहरूको सुरक्षा गर्न र जीवन बचाउन किएभलाई थप हवाई प्रतिरक्षा प्रणालीको आवश्यकता रहेको बताउनुभयो ।
जेलेन्स्कीले नेटो–युक्रेन परिषद्को बैठकमा भन्नुभयो, “रक्षा गर्न, हामीलाई थप सात ‘प्याट्रियट्स’ वा यस्तै हवाई रक्षा प्रणाली चाहिन्छ र यो न्यूनतम सङ्ख्या हो । ती हतियारले धेरै युक्रेनी जीवन बचाउन सक्छन् र वास्तवमा स्थिति परिवर्तन गर्न सक्छन् ।”
उहाँले थप्नुभयो, “यो वर्ष हामी निर्णयको प्रतिक्षा गर्न सक्दैनौं ।” युक्रेन रुसी आक्रमण रोक्न पश्चिमी, मुख्यतया अमेरिकी सैन्य समर्थनमा निर्भर छ ।
