जेरुसेलम । इजरायली प्रधानमन्त्री बेन्जामिन नेतन्याहुले बिहीबार वासिङ्टनको यहुदी संग्रहालयबाहिर ‘फ्री प्यालेस्टिन’ भन्दै हल्ला गर्ने बन्दुकधारीले दूतावासका दुई कर्मचारीको गोली हानी हत्या गरेपछि विश्वव्यापी इजरायली कूटनीतिक मिसनहरूमा सुरक्षा उपायहरू बढाउने आदेश दिएको बताएका छन् ।

‘मैले विश्वभरका इजरायली मिसनहरूमा सुरक्षा व्यवस्था बढाउन र राज्यका प्रतिनिधिहरूको सुरक्षा बढाउन निर्देशन दिएको छु,’ उनले भने, ‘हामी यहुदीविरोधी भावना र इजरायल राज्यविरुद्धको जंगली उक्साहटको भयानक मूल्य देखिरहेका छौँ ।’

बुधबार राति वासिङ्टनको केन्द्रमा रहेको क्यापिटल यहुदी संग्रहालयमा युवा पेसेवरहरू र कूटनीतिक कर्मचारीहरूका लागि सामाजिक कार्यक्रम भइरहेको वेला संग्रहालय बाहिर गोली हानाहान भएको थियो ।

सामाजिक सञ्जालमा फैलिएको एक भिडियो क्लिपमा ज्याकेट र सेतो सर्ट लगाएका एकजना दाह्री भएका युवकलाई प्रहरीले लैजाँदा ‘फ्री, फ्री प्यालेस्टिन’ भनेर चिच्याएको देखाइएको छ ।

संयुक्त राज्य अमेरिकाका लागि इजरायली राजदूत येचिएल लेइटरका अनुसार पीडितहरू विवाह गर्ने योजना बनाएका एक युवादम्पती थिए ।

इजरायली राष्ट्रपति आइज्याक हर्जोगले घातक आक्रमणबाट आफू ‘स्तब्ध’ भएको, तर दुई देश ‘हाम्रा जनताको रक्षामा एकजुट हुने’ बताएका छन् ।

‘इजरायली दूतावासका दुई युवा कर्मचारीको ज्यान लिएको यो घृणा, यहुदी विरोधको घृणित कार्य हो,’ हर्जोगले भने, ‘अमेरिका र इजरायल हाम्रा जनता र हाम्रा साझा मूल्यहरूको रक्षामा एकजुट हुनेछन् । आतंक र घृणाले हामीलाई तोड्नेछैन ।’

विदेशमन्त्री गिडियोन सारले पनि आक्रमणबाट आफू ‘डराएको’ भन्दै इजरायलले ‘आतंक’मा नझुक्ने प्रतिज्ञा गरे ।

‘विशेष गरी यस समयमा विश्वभरका इजरायली प्रतिनिधिहरूले निरन्तर उच्च जोखिमको सामना गरिरहेका छन्,’ उनले भने, ‘हामी अमेरिकी अधिकारीहरूसँग निकट सम्पर्कमा छौँ । इजरायलले आतंकका सामु आत्मसमर्पण गर्नेछैन ।’