काठमाडौँ । काठमाडौँ उपत्यकासहित देशका विभिन्न जिल्लामा कर्फयू र निषेधाज्ञा केहि खुकुलो भए पनि सार्वजनिक गाडी नचल्दा सर्वसाधरण यात्रुलाई सास्ती भएको छ । शान्ति सुरक्षा कायम राख्न सुरक्षा निकायले दिउँसोको निषेधाज्ञा र रातिको कर्फयूलाई केही खुकुलो बनाउँदै निरन्तरता दिएको छ ।
अत्यावश्यक कामको लागि भन्दै बिहान र बेलुका केहीबेर कर्फयू र निषेधाज्ञा हटाइएको छ । योबेला बजारमा किनमेल गर्नेहरुको चहलपहल बढ्ने गर्छ । तर कर्फयू र निषेधाज्ञा हटेको बेलामा पनि सार्वजनिक गाडी चलेका छैनन् । आफ्नो साधन नहुनेहरु पैदलै हिँड्न बाध्य छन् । हवाई यात्रुहरुलाई सबैभन्दा धेरै समस्या परेको छ ।
बुधबार बेलुकादेखि अन्तर्राष्ट्रिय र हिजो बिहानदेखि आन्तरिक उडान खुलेको छ । हवाई यात्रुहरुले कर्फयू र निषेधाज्ञाको अवधिमा पनि आफ्नो उडानको टिकट देखाई विमानस्थलसम्म आवतजावत गर्न सक्ने भनिएको छ । तर सार्वजनिक बस र ट्याक्सी चल्न नसक्दा हवाई यात्रुहरु पैदलै हिँड्न बाध्य छन् ।
काम विशेषले हिँडडुल गर्नुपर्ने अरुलाई पनि सकस भइरहेको छ । लामो दूरीका गाडी नचल्दा हजारौं यात्रु बिचल्लीमा छन् । यातायात व्यवसायीहरुले सुरक्षाको प्रत्याभूति नभएसम्म गाडी चलाउन नसकिने स्पष्ट पारेका छन् । यसैबीच काठमाण्डौ उपत्यकाका तीन जिल्लामा अत्यावश्यक कामको लागि आवतजावत गर्न बिहान ५ घण्टा र बेलुकी २ घण्टा समय निर्धारण गरिएको छ ।
आज बिहान ११ बजेदेखि बेलुकी ५ बजेसम्म निषेधाज्ञा र बेलुकी ७ बजेदेखि भोलि बिहान ६ बजेसम्म कर्फयूलाई निरन्तरता दिइएको छ । अत्यावश्यक कामको लागि आवतजावत गर्न आज बिहान ६ बजेदेखि ११ बजेसम्म र बेलुकी ५ बजेदेखि ७ बजेसम्म निर्धारण गरिएको छ ।
अत्यावश्यक कामका लागि आवतजावत गर्न सकिने भनि छुट्याइएको समय अत्यावश्यक सामग्री किनमेल एवम् धार्मिक–सांस्कृतिक परम्परा अवलम्बनका लागि हिँडडुल गर्न, कर्मचारीहरु आफ्नो कार्यस्थलसम्म जान र फर्कनलगायतका जरुरी कामका लागि भएकाले यस समयमा समेत जुलुस, धर्ना, प्रदर्शनलगायतका गतिविधिहरु गर्न पूर्णतः निषेध गरिएको सेनाले जनाएको छ ।