काठमाडौं । समाजसेवा र हास्यव्यङ्ग्यको माध्यमबाट घर–घरमा पुगेका कलाकार सीताराम कट्टेल ‘धुर्मुस’ ले गौतम बुद्ध अन्तर्राष्ट्रिय क्रिकेट रंगशाला निर्माण परियोजनाबाट पूर्ण रूपमा अलग हुने घोषणा गरेका छन् । पाँच वर्षको प्रतीक्षा र निरन्तर असहयोगका कारण आफू मानसिक र भावनात्मक रूपमा थकित बनेको भन्दै उनले भरतपुर महानगरपालिकामाथि गम्भीर आरोप समेत लगाएका छन् ।
धुर्मुसले अनुसार महानगरपालिकासँग ठोस सम्झौता हुँदाहुँदै पनि निर्धारित रकम भुक्तानी नदिइकन पटक–पटक कागजपत्रका बहानामा आफूलाई झुलाइँदै आएको गुनासो गरे । ‘धेरै सहें, सहनशीलताको पनि सीमा हुन्छ’,’ धुर्मुसले भावुक हुँदै भने, ‘भरतपुरवासीसँग कहिल्यै गुनासो छैन । तर, महानगर कार्यालयबाट आजको दिनसम्म कुनै ठोस पहलकदमी आएन । यहाँ म आज अन्तिम पटक आएको हुँ, अब म फर्किंदिनँ ।’
सरकारी प्रतिवेदनका अनुसार धुर्मुस–सुन्तली फाउन्डेसनले थालेको यस महत्वाकांक्षी परियोजनामा अझै करिब १८ करोड रुपैयाँ बराबरको दायित्व बाँकी छ । सरकारबाट १५ करोड रुपैयाँ भरतपुर महानगरमार्फत उपलब्ध गराइने घोषणा भए पनि त्यो रकम प्रक्रियागत अपूरोपनाको नाममा रोकिएको धुर्मुसको आरोप छ । परियोजनामा डुब्दै जाँदा धुर्मुस मानसिक तनावमा परेको उनका नजिकका मानिसहरुले बताउँदै आएका छन् ।
आर्थिक बोझ, प्रशासनिक अड्चन र निरन्तर दौडधूपका कारण उनी शारीरिक र मानसिकरूपमा कमजोर बनेका देखिन्छन् । यता, धुर्मुसको परिवार पनि चुनौतीपूर्ण अवस्थाबाट गुज्रिरहेको छ । उनकी एक मात्र छोरी दीर्घरोगसँग जुधिरहेकी छन् । उनकी पत्नी तथा कलाकार कुञ्जना घिमिरे ‘सुन्तली’ ले भनिन्, ‘मैले उनलाई धेरै वर्षदेखि सम्हालेर ल्याइरहेकी छु । अब उनलाई उठाउने जिम्मा जनताको हो ।’ धुर्मुसको घोषणासँगै रंगशाला निर्माणको भविष्य पुनः अनिश्चित बनेको छ भने भरतपुर महानगर र फाउन्डेसनबीचको विवाद पनि नयाँ मोडतर्फ उन्मुख भएको छ ।