Tag: निकोलस भुसाल

काठमाडौं । अनसनरत डा. निकोलस भुसालसँग वार्ता गर्न सरकारले वार्ता समिति बनाएको छ । प्रधानमन्त्री तथा मन्त्रिपरिषद्को कार्यालयले १० दिनदेखि विभिन्न माग राख्दै अनसन बसेका भुसालसँग वार्ता गर्न समिति गठन गरेको हो । भुसालसँग वार्ता गर्न प्रधानमन्त्रीको प्रमुख सल्लाहकार अजयभद्र खनालको संयोजकत्वमा समिति गठन गरेको प्रधानमन्त्री कार्यालयले जनाएको छ । विभिन्न माग राखी केही दिनदेखि अनसनरत भुसालको नेतृत्वको समूहसँग वार्ता गर्न समिति गठन गरी खनाललाई संयोजक तोकिएको छ । उक्त वार्ता टोलीमा ३ सदस्य समेत रहेका छन् ।

सदस्यहरुमा प्रधानमन्त्रीको जनसम्पर्क सल्लाहकार गोविन्द नारायण तिमिल्सिना, प्रधानमन्त्री तथा मन्त्रिपरिषद्को कार्यालयका सहसचिव डा. भीष्मकुमार भूसाल र जिल्ला प्रशासन कार्यालय, काठमाडौंका प्रमुख जिल्ला अधिकारी ईश्वर राज पौडेल छन् । भुसालले प्रधानमन्त्री सुशीला कार्कीको राजीनामा, प्रदेश खारेजीलगायतका विभिन्न मागहरु राखेर माइतीघरमा अनशन बसेका थिए । बुधबार उनको स्वास्थ्यमा समस्ंया आएपछि उपचारको लागि वीर अस्पतालमा लगिएको छ । उनको अहिले उपचार जारी छ ।

काठमाडौं । सामाजिक सञ्जालमार्फत आइतबार दिउँसो २ बजे माइतीघर मण्डलामा सरकारविरुद्ध प्रदर्शन गर्ने घोषणा गरेका अभियन्ता निकोलस भुसाल ‘सम्पर्कविहीन’ बनेका छन् । कार्यक्रम अघि नै उनी हराएपछि प्रहरीले खोजी कार्य सुरु गरेको छ । प्रहरी स्रोतका अनुसार भुसालले लागूऔषध सेवन गरेको अवस्थामा प्रदर्शनको घोषणा गरेका थिए, जसले मुठभेड हुने सम्भावना देखिएकाले उनलाई नियन्त्रणमा लिन तयारी गरिएको थियो । तर उनी न घर–परिवारको सम्पर्कमा छन्, न प्रहरीको । प्रहरीले भेटिएपछि उनलाई रिह्याब सेन्टर पठाउने तयारी गरेको छ ।

काठमाडौंका विभिन्न प्रहरी टोली आइतबार बिहानैदेखि उनको खोजीमा सक्रिय छन् । उनी बस्ने डेरामा पुग्दा ढोका बाहिरबाट बन्द अवस्थामा भेटिएको र मोबाइल स्विच अफ रहेको प्रहरीले जनाएको छ । परिवारका सदस्यले समेत उनी सम्पर्कविहीन रहेको पुष्टि गरेका छन् ।
भुसालले घोषणा गरेको प्रदर्शनका लागि जिल्ला प्रशासन कार्यालयबाट अनुमति लिएको पाइएको छैन । काठमाडौं प्रहरी परिसरका प्रवक्ता एसपी पवन भट्टराईले अनुमति बिना कुनै पनि कार्यक्रम गर्न नपाइने भन्दै अनधिकृत गतिविधि भए नियन्त्रणमा लिइने चेतावनी दिएका छन् ।

प्रहरी स्रोतका अनुसार भुसालको प्रदर्शनको जानकारी पाएपछि एमाले सम्बद्ध युवा संघ र काठमाडौंका मेयर बलन साहका समर्थकहरूले प्रतिकार गर्ने तयारी समेत गरेका थिए । यही सम्भावित भिडन्त रोक्न प्रहरी सचेत भएको हो । यसअघि पनि निकोलस भुसाल पटक–पटक पक्राउ परेका थिए । गत असोज २३ गते माइतीघर मण्डलामै प्रदर्शनका क्रममा पक्राउ परेका उनलाई स्वास्थ्य परीक्षण गर्दा गाँजा सेवन गरेको पुष्टि भएको थियो । सोभन्दा अघि २०८१ पुस ७ गते कास्की प्रहरीले रास्वपा सभापति रवि लामिछानेको हिरासतभित्रको तस्बिर सार्वजनिक गरेको आरोपमा उनलाई पक्राउ गरेको थियो ।