काठमाडौं । काठमाडौं महानगरपालिकाको मेयर पदबाट राजीनामा दिएपछि राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) देशव्यापी राजनीतिक अभियानमा सक्रिय बनेका छन् । पूर्वका विभिन्न जिल्लाको भ्रमण सकेर काठमाडौं फर्किएका बालेन अब सुदूरपश्चिम जाने तयारीमा छन् ।
गत ४ माघमा मेयर पदबाट राजीनामा दिएका बालेन त्यसै दिन जनकपुर पुगेका थिए । माघ ५ गते जनकपुरमा आयोजित सभामा सहभागी भएपछि उनी झापा पुगे, जहाँबाट उनले आगामी प्रतिनिधिसभा निर्वाचनका लागि झापा क्षेत्र नं. ५ बाट उम्मेदवारी दर्ता गराएका छन् । उम्मेदवारीपछि बालेनले पूर्वका इलाम, ताप्लेजुङ, पाँचथर र तेह्रथुम लगायतका जिल्लामा पुगेर समर्थकहरूसँग भेटघाट गरे ।
शनिबार बिहान धनकुटा सदरमुकाम पुगेका बालेन त्यहाँ भने गाडीबाट नओर्लिकन फर्किएका थिए । सोही दिन अपरान्ह इटहरी पुगेका उनले समर्थकहरूसँग गाडीबाटै संक्षिप्त भेटघाट गरे र त्यसपछि विमानमार्फत काठमाडौं फर्किएका हुन् । झापा केन्द्रित बसाइ र पूर्वी पहाडका जिल्लामा गरिएको भ्रमणलाई बालेनको चुनावी अभियानको प्रारम्भिक चरणका रूपमा हेरिएको छ ।
पूर्वबाट फर्किए लगत्तै बालेन अब सुदूरपश्चिम जाने कार्यक्रम तय भएको छ । अछामदेखि कैलालीसम्म विभिन्न जिल्लामा पुगेर चुनावी प्रचारमा सहभागी हुने उनको योजना छ । सुदूरपश्चिममा बालेन निकट व्यक्तिहरू उम्मेदवार बनेकाले ती क्षेत्रलाई प्राथमिकतामा राखेर भ्रमण गर्न लागेको बताइन्छ । उनका प्रमुख स्वकीय सचिव भूपदेव शाह अछाम–२ बाट र कोर टिमका सदस्य केपी खनाल कैलाली–२ बाट उम्मेदवार बनेका छन् ।
यद्यपि, झापामा रहँदा बालेनले प्रयोग गरेको महँगो गाडीलाई लिएर विवाद पनि उत्पन्न भएको थियो । एक व्यवसायीले उपलब्ध गराएको उक्त गाडी बालेनले प्रयोग गरेपछि आलोचना सुरु भएको थियो । विवाद चर्किएपछि उनले उक्त गाडी झापामै छोडेर काठमाडौं फर्किएको निकट स्रोतले जनाएको छ । सुदूरपश्चिमको भ्रमण सकेपछि बालेन पुनः काठमाडौं फर्किने छन् । त्यसपछि काठमाडौं र ललितपुरका केही निर्वाचन क्षेत्रमा समेत उनी चुनावी अभियानमा सक्रिय हुने कार्यक्रम तय भएको छ ।
यसैबीच, एमाले अध्यक्ष केपी शर्मा ओलीसँग सार्वजनिक बहस (पब्लिक डिबेट) गर्ने प्रस्तावलाई बालेनले स्पष्ट रूपमा अस्वीकार गरेका छन् । ओलीले सामाजिक सञ्जालमार्फत भावी प्रधानमन्त्रीका आकांक्षी नेताहरूबीच सार्वजनिक बहस आवश्यक रहेको उल्लेख गर्दै आफू त्यसका लागि तयार रहेको बताएका थिए । ओलीको उक्त प्रस्तावमा प्रतिक्रिया जनाउँदै बालेनले बहसमा नआउने मात्र होइन, ओलीमाथि गम्भीर आरोप र प्रश्न समेत उठाएका छन् ।
सामाजिक सञ्जालमा कमेन्ट गर्दै बालेनले लेखेका छन्, ‘‘आफूलाई आतंकवादी चाहिँ कहिले स्वीकार्ने हो ? त्योपछि अरू कुरा गरौंला !’ उनले अगाडि थप्दै विगतका घटनालाई संकेत गर्दै ७६ जना बालबालिकाको हत्या र त्यससँग सम्बन्धित आरोपमा ओली र उनको समूहसँग एउटै मञ्चमा उभिनु आफू पनि त्यसमा सामेल भएको अर्थ लाग्ने बताएका छन् । बालेनको यो अभिव्यक्तिले चुनावी बहस झनै तातिने संकेत देखिएको छ । मेयर पदबाट राजीनामा दिएपछि देशका विभिन्न भूभागमा सक्रिय राजनीतिक उपस्थिति देखाइरहेका बालेनको आक्रामक शैली, विवादास्पद अभिव्यक्ति र तीव्र चुनावी गतिविधिले आगामी निर्वाचनमा नयाँ राजनीतिक ध्रुवीकरणको संकेत गरिरहेको विश्लेषकहरू बताउँछन् ।
