Tag: रक्षा बम

काठमाडौं । राजनीतिक वृत्तमा प्रत्यक्ष निर्वाचित कार्यकारी प्रणालीबारे पुनः तापिएको बहसका बीच नेपाल जेनजी फ्रन्टकी संयोजक रक्षा बमले उक्त विषयलाई सडक वा बन्द कोठाको छलफलबाट होइन, चुनावी म्यान्डेटबाट निर्णय गर्नुपर्ने धारणा राखेकी छिन्। बमका अनुसार संविधान संशोधन वा शासन प्रणाली परिवर्तनजस्ता निर्णायक मुद्दा जनतासमक्ष स्पस्ट एजेण्डा बनाएर पेश गर्नु नै सबैभन्दा वैधानिक र लोकतान्त्रिक मार्ग हो । सामाजिक सञ्जालमार्फत प्रतिक्रिया दिँदै उनले प्रत्यक्ष निर्वाचित प्रणाली चाहने शक्ति वा नेताहरूले यसको खाका बोकेर हिँड्नुभन्दा अघि जनताको दोलनमा जानुपर्नेमा जोड दिइन् ।

संयोजक बमले पछिल्लो राजनीतिक हलचलप्रति टिप्पणी गर्दै, राज्य सञ्चालक संरचना बदल्ने जस्ता संवेदनशील विषयमा हतार र उत्तेजनाले देशलाई थप अस्थिरतामा धकेल्न सक्ने बताइन् । ‘देश जादुको छडीले चल्ने संरचना होइन। विधिको शासन, लोकतान्त्रिक मूल्य र जनसहभागिता नै राज्य सञ्चालनको मेरुदण्ड हो’, उनले लेखेकी छिन् । उनी संविधान पुनरावलोकनको पक्षमा भए पनि त्यसका लागि ‘जनताको स्पष्ट म्यान्डेट’ अपरिहार्य रहेको बताउँछिन् ।

उनले प्रत्यक्ष निर्वाचित कार्यकारी प्रणाली ल्याउन चाहने शक्तिहरूलाई आगामी चुनावमा नै यो मुद्दा उठाएर भोट माग्न चुनौती समेत दिइन् । ‘संविधान संशोधन वा प्रत्यक्ष निर्वाचित प्रणालीको प्रस्ताव राख्नेहरू चुनावी घोषणापत्रमै त्यसलाई उल्लेख गर्दै जनताको भरोसा लिन तयार हुनुपर्छ’, बमको भनाइ छ । बमले संक्रमणकालीन अवस्थामा अनावश्यक हस्तक्षेप र अस्थिरता निम्त्याउने गतिविधि समेत तीव्र आलोचना गरिन् । राज्यलाई अनिश्चिततामा धकेल्न खोज्ने प्रयासका विरुद्ध आफू र आफ्नो संगठन दृढतापूर्वक उभिने चेतावनी पनि दिइन् । उनको भनाइमा–देशले संरचनात्मक परिमार्जनबारे गम्भीर बहस गर्न सक्छ, तर त्यो बहस जनताबाट प्राप्त अधिकार र प्रक्रियागत वैधानिक मार्गबाटै हुनुपर्छ ।

काठमाडौं । प्रधानमन्त्री सुशीला कार्कीको सचिवालयमा नातावाद र कृपावाद बढेको दाबी गर्दै जेनजी आन्दोलनकी युवा नेता रक्षा बमले प्रमुख स्वकीय सचिव आदर्शकुमार श्रेष्ठलाई तुरुन्तै पदमुक्त गर्न माग गरेकी छन् । सचिवालयभित्रका केही नियुक्तिहरू श्रेष्ठका परिवारजन र नातेदार रहेको समाचार सार्वजनिक भएपछि बमले सामाजिक सञ्जालमार्फत कडा प्रतिक्रिया दिएकी हुन् ।

बमका अनुसार महत्वपूर्ण संवैधानिक संक्रमणकालीन चरणमा रहेको नागरिक सरकारलाई दुरुपयोग गर्दै स्वकीय सचिव स्तरका व्यक्तिहरूले पदको प्रभाव प्रयोग गरेर आफ्नै परिवारी जनालाई जागिर दिलाउनु नातावाद र नैतिक पतनको ज्वलन्त उदाहरण हो । उनले लेखेकी छन्, ‘जेनजी विद्रोह केवल रकमको भ्रष्ट्राचारविरुद्ध मात्र होइन, नैतिक विचलन, नातावाद र कृपावादविरुद्धको आन्दोलन पनि थियो । यस्तो बेलामा अधिकारीहरूले स्वार्थी व्यवहार देखाउनु परिवर्तनका लागि बगेको रगतप्रति अपमान हो ।’

तीन महिनाअघि भएको जेनजी विद्रोहले सुशासन, पारदर्शिता र जवाफदेहिताको माग उठाएको स्मरण गराउँदै बमले सरकारको मूलभूत मूल्यप्रति आफ्नो बफादारी देखाउन सबै पदाधिकारी सचेत हुनु आवश्यक रहेको बताएकी छन् । उनका अनुसार साधारण नागरिकको विश्वासमा बनेको सरकार सीमित व्यक्तिको प्रभावमा चल्न थाले लोकतान्त्रिक उपलब्धि खतरामा पर्न सक्छ ।

उनले सामाजिक सञ्जालमा लेखेकी छन्, ‘प्रधानमन्त्रीका प्रमुख स्वकीय सचिवले आफ्नै पत्नी र अन्य नातेदारलाई नियुक्ति दिलाउनु नैतिक भ्रष्टाचारको चरम रूप हो । यस्तो प्रवृत्तिलाई तत्काल रोकिनु पर्छ ।’ बमले सरकारलाई तत्काल कदम चाल्न आग्रह गर्दै श्रेष्ठलाई पदमुक्त गर्न तथा समीकरण मिलाइ नियुक्त गरिएका नातेदारहरूको जागिर रद्द गर्न चुनौतीपूर्ण व्यापक छानबिन आवश्यक रहेको उल्लेख गरेकी छन् ।

 

काठमाडौं । नेपाल जेन–जी फ्रन्टकी संयोजक रक्षा बमले गृहमन्त्री ओमप्रकाश अर्यालको राजीनामा आवश्यक नभएको बताएकी छन् ।सरकार पक्षसँगका वार्ताहरूमा जेनजीका तर्फबाट अघि सरिरहेका ‘हामी नेपाल’ का संस्थापक सुदन गुरुङले गृहमन्त्री ओमप्रकाश अर्यालको राजीनामा मागे लगत्तै जेनजी आन्दोलनका एक अगुवा तथा ‘जेन–जी फ्रन्ट नेपाल’ का संयोजक रक्षा बमले त्यसको खण्डन गरेकी छन् ।

बमले आफूहरूले गृहमन्त्रीको राजीनामा होइन, परिणाम र काम चाहेको बताएकी छिन् । ‘हामी नागरिक सरकारको पक्षमा छौँ तर खबरदारी निरन्तर गर्छौँ’, उनले बिहीबार सामाजिक सञ्जालमा लेखेकी छन्, गृहमन्त्रीको राजीनामा चाहँदैनौँ, परिणाम र काम चाहन्छौं ।’

यसअघि सुदन गुरुङले गृहमन्त्री अर्यालले काम गर्न नसकेको भन्दै पद छाड्नु पर्ने बताएका थिए । ‘अलोकप्रिय गृहमन्त्रीको लागि सन्देश’ भन्दै सुदनले सामाजिक सञ्जालमार्फत भनेका छन्, ‘सहिदको रगत सम्झनुहोस् । नेपाल र नेपालीको आशा र आँसु सम्झनुहोस् । काम गर्न नसके पद छोड्ने गर्नुभएको वाचा सम्झनुहोस् । देशको हितको लागि लड्दा मैले भ्रामक समाचारद्वारा यत्रो अपमानदेखि चरित्र हत्या समेत सहेर बसें । कुनै स्पष्टीकरण पनि दिन उचित ठानिनँ । कज मैले सोचेको थिएँ, कामले देखाउँछ र कामले बोल्छ । अझै पनि देश बन्छ भने करोडौँ अट्याकहरू सहन तयार छु तर, अब तपाईँबाट आशा मरिसकेको छ ।’