काठमाडौं । विश्व फुटबलका महान् खेलाडी लियोनल मेस्सीको हालै सम्पन्न भारत भ्रमण केवल खेलकुद कार्यक्रममै सीमित रहेन । ‘द गोट टुर इण्डिया २०२५’ अन्तर्गत तीन दिन चार सहरको यात्रा गरेका मेस्सीले भारतीय संस्कृति, परम्परा र वन्यजन्तु संरक्षणप्रतिको सम्मानमार्फत लाखौं प्रशंसकको मन जितेका छन् । १३ डिसेम्बरमा भारत पुगेका अर्जेन्टिनी सुपरस्टार सोमबार स्वदेश फर्किए । यस अवधिमा उनले कोलकाता, हैदराबाद, मुम्बई र दिल्लीको भ्रमण गरे । जहाँ–जहाँ मेस्सी पुगे, त्यहाँ उत्साहको सागर देखियो । विमानस्थलदेखि कार्यक्रमस्थलसम्म फ्यानहरूको भीड, पोस्टर, नाराबाजी र स्वागत समारोहले भारतमा उनको लोकप्रियता झल्कायो ।
मेस्सीको दोस्रो भारत भ्रमणका क्रममा कोलकाता विशेष केन्द्रमा रह्यो । सन् २०११ मा पहिलो पटक भारत आउँदा कोलकातामै भेनेजुएलाविरुद्ध मैत्रीपूर्ण खेल खेलेका मेस्सीलाई यस पटक प्रत्यक्ष देख्न नपाएको भन्दै केही प्रशंसकले साल्ट लेक स्टेडियम आसपास तोडफोड गरे । घटनापछि पश्चिम बंगालको राजनीति समेत तरंगित बनेको छ । मेस्सी स्वयं भने सो घटनामा संलग्न नभई आफ्नो कार्यक्रम सकेर फर्किएका छन् । मेस्सीको भारत भ्रमणको सबैभन्दा भावुक र चर्चित क्षण भने गुजरातको जामनगरस्थित वनतारा संरक्षण केन्द्रमा देखियो । विश्वकै ठूलो वन्यजन्तु उद्धार, पुनर्वास र संरक्षण केन्द्रका रूपमा परिचित वनतारामा उनले परम्परागत स्वागत पाए । लोक संगीत, फूलको वर्षा र धार्मिक अनुष्ठानबीच मेस्सीले सनातन परम्पराप्रति सम्मान प्रकट गरे ।
उद्योगपति मुकेश अम्बानीका छोरा अनन्त अम्बानीको निमन्त्रणामा जामनगर पुगेका मेस्सी आफ्ना साथी खेलाडी लुइस सुआरेज र रोद्रिगो डे पलसँगै थिए । करिब ३ हजार एकडमा फैलिएको वनतारामा सिंह, बाघ, हात्ती, चितुवा लगायतका जनावरहरूको संरक्षण गरिन्छ । सार्वजनिक भएका तस्बिर र भिडियोमा मेस्सीले पूजा थाली समातेर आरती गरिरहेको, टीका लगाइरहेको र शान्त भावमा प्रार्थना गरिरहेको देखिन्छ । उनले अम्बे माता पूजा, गणेश पूजा, हनुमान पूजा र शिव अभिषेकमा सहभागिता जनाए । विशेषगरी हनुमानजीको मूर्तिअगाडि श्रद्धापूर्वक आशीर्वाद लिएको दृश्य सामाजिक सञ्जालमा निकै चर्चित बन्यो । फ्यानहरूले मेस्सीलाई केवल महान् खेलाडी मात्र नभई संस्कृति र मानवताप्रति सम्मान देखाउने व्यक्तित्वका रूपमा प्रशंसा गरिरहेका छन् । ‘धर्म फरक भए पनि परम्पराको आदर गर्नु नै ठूलो मानवीय गुण हो’ भन्ने सन्देश मेस्सीको व्यवहारले दिएको प्रतिक्रिया सामाजिक सञ्जालमा व्यापक देखिन्छ।
मेस्सीले धार्मिक कार्यक्रममा मात्र होइन, वनताराको संरक्षण अभियानको खुलेर प्रशंसा गरे । उनले जनावरहरूको केयर सेन्टर अवलोकन गरे, सिंह–बाघसँग नजिकबाट भेटे र कर्मचारीहरूसँग संवाद गरे । उनले स्पेनिस भाषामा भनेका छन्, ‘वनताराले जनावरहरूको लागि गरिरहेको काम साँच्चै सुन्दर छ । उनीहरूलाई बचाउने र हेरचाह गर्ने तरिका अत्यन्त प्रभावशाली छ । हामीले यहाँ अद्भुत समय बितायौँ ।’ चार सहरको भ्रमणमा लाखौँ भारतीय फ्यानले मेस्सीलाई स्वागत गरे । भीड, उत्साह र भावनात्मक क्षणबीच मेस्सीको यो यात्रा खेलकुदभन्दा पर गएर सांस्कृतिक कूटनीतिक उदाहरण बनेको छ । मैदानमा गोल गरेर इतिहास रच्ने ‘द गोट’ ले भारतमा भने नम्रता, सम्मान र मानवताको सन्देश छोडेर विदा लिएका छन् ।