स्याङ्जा । स्याङ्जाको पुतलीबजार नगरपालिका–४ का वडाध्यक्ष शिवबहादुर थापा २७ महिनादेखि सम्पर्कविहीन बनेपछि स्थानीय तहमा नैतिकता, जवाफदेहीता र प्रशासनिक कमजोरीबारे गम्भीर प्रश्न उठिरहेका छन् । स्वास्थ्य उपचारका लागि विदेश जानुपर्ने भन्दै २०८० भदौ १५ मा उनले वडा सदस्य लिलावती पौडेललाई कार्यवाहक जिम्मेवारी हस्तान्तरण गरेका थिए । आर्थिक वर्ष २०८०/८१ को चलानी नम्बर १६७ मा दर्ता पत्रमार्फत थापाले ‘दैनिक रूपमा उपस्थित हुन नसक्ने’ भन्दै प्रत्यायोजित अधिकार दुरुपयोग नहुने गरी कार्यवाहक तोकिएको उल्लेख गरेका थिए । यही पत्र प्रशासन, अदालत र नगरपालिकामा समेत पठाइएको थियो ।
तर पत्र पठाएको महिना दिनमै थापा अमेरिका पुगे र त्यसयता उनी वडासँग, पालिकासँग वा पार्टीसँग कुनै सम्पर्कमा नरहेको बुझिएको छ । नगरपालिकाका प्रमुख तुलसीराम रेग्मीका अनुसार थापाको अवस्था वा स्थानबारे नगरपालिकासँग कुनै आधिकारिक खबर छैन ।
यसबीच, थापाले विदेशमै बसेर पनि झण्डै १० महिना सेवा–सुविधा भुक्तानी पाएका छन् । प्रमुख प्रशासकीय अधिकृत धर्मराज ढुङ्गानाका अनुसार २०८० भदौदेखि २०८१ असार मसान्तसम्म थापाको बैंक खातामा यातायात, पत्रपत्रिका, मोबाइल रिचार्ज, अतिथि सत्कार, समन्वय सहजीकरण, बैठक तथा अनुगमन जस्ता शीर्षकमा २ लाख ७६ हजार १९० रुपैयाँ जम्मा गरिएको तथ्यांक छ । ढुङ्गानाका अनुसार २०८१ साउनदेखि मात्रै पालिकाले सेवा–सुविधा रोकिएको हो ।
कार्यवाहक वडाध्यक्ष लिलावती पौडेल भने निरन्तर अनिश्चिततामा छिन् । थापा फर्कने कि नफर्कने स्पष्ट नभए पनि उनले नियमित काम रोक्न नसकिने बताउँछिन् । ‘जनताको काममा धक्का नपरोस् भनेर म निरन्तर वडामै व्यस्त छु’, उनले सुनाइन् । थापा नेपाली कांग्रेसबाट निर्वाचित वडाध्यक्ष हुन् । तर विदेश जाने निर्णयमा पार्टीलाई समेत जानकारी नदिएको कांग्रेसका नगर सभापति सुरजकुमार अधिकारी बताउँछन् । ‘उनले पार्टीसँग कुनै छलफल नगरी हराए जस्तै भएका छन्’, अधिकारीले गुनासो गरे। जनप्रतिनिधि भएर विदेशिनु, लामो समयसम्म सम्पर्कविहीन रहनु, पालिकाले निरन्तर सुविधा भुक्तानी गर्नु र नगरपालिकाले समेत वडाध्यक्षको अवस्थाबारे अज्ञानता प्रकट गर्नुले स्थानीय शासन व्यवस्थाकै विश्वसनीयता र पारदर्शिता प्रश्नचिन्हमा परेको छ । पुतलीबजार–४ मा केवल वडाध्यक्ष मात्र होइन, समग्र स्थानीय प्रशासनिक संयन्त्र नै थापाको ‘गायब’ यात्रासँगै आलोचनाको घेरामा परेको छ ।