Tag: सगरमाथा

काठमाडौं । पहिलो सगरमाथा आरोहण दलको सदस्य कान्छा शेर्पाको आज टेकु दोभानस्थित चिन्तामणि घाटमा अन्त्येष्टि गरिएको छ । कपनस्थित निवासमा ९२ वर्ष उमेरमा निधन भएका शेर्पाको पार्थिव शरीरमा शहरी विकास, ऊर्जा, जलस्रोत तथा सिँचाइ र भौतिक पूर्वाधार तथा यातायातमन्त्री कुलमान घिसिङले राष्ट्रिय झण्डा ओढाउनुका साथै सशस्त्र प्रहरी बलको एक टुकडीले अन्तिम सलामी अर्पण गरेको थियो ।

सन् १९५३ को सगरमाथा आरोहणमा एडमन्ड हिलारी र तेन्जिङ नोर्गे शेर्पाले सगरमाथा शिखर आरोहण गर्दा उक्त आरोहण दलमा भरियाका रूपमा संलग्न शेर्पा ८ हजार मिटरको उचाइमा पुगेका थिए । शेर्पा हालसम्म सो आरोहण दलको एक मात्र जीवित सदस्यका रूपमा रहेका थिए ।

काठमाडौं । सगरमाथाको दुर्गम तिब्बती स्लोपमा आएको हिमआँधीका कारण पहाडको पूर्वी भेगका शिविरहरूमा सयौं पर्वतारोही र पदयात्री फसेका छन् । जसको उद्धार प्रयास जारी रहेको बीबीसीले जनाएको छ ।

उक्त क्षेत्र समुद्र सतहबाट चार हजार ९०० मिटरभन्दा माथिको उचाइमा छ । त्यहाँ पुग्ने बाटोमा थुप्रिएको हिउँ हटाउन सयौं स्थानीय बासिन्दा र उद्धार टोलीहरूलाई परिचालन गरिएको छ । स्थानीय सञ्चार माध्यमहरूले करिब ३५० जनाको उद्धार गरी सुरक्षित रूपमा कुडाङ सानो बस्तीमा पुर्‍याइएको रोयटर्स समाचार एजेन्सीले जनाएको छ ।

शुक्रबार साँझदेखि नै भारी हिमपात सुरु भएको थियो । यो क्षेत्र पर्वतारोही र पदयात्रीहरूका लागि लोकप्रिय मानिन्छ । कुडाङ पुग्न सफल भएका पदयात्रा समूहका चेन गेसुआङले रोयटर्सलाई भने, ‘मौसम अत्यन्त चिसो र भिजेको थियो, हाइपोथर्मियाको खतरा थियो ।’

चिनियाँ सरकारी सञ्चार माध्यमका अनुसार, तिब्बतको ब्लू स्काई उद्धार टोलीले भारी हिमपातका कारण पालहरू भत्किएको र केही पदयात्रीहरूमा हाइपोथर्मियाका लक्षण देखिएको भन्दै सहयोगका लागि अनुरोध प्राप्त गरेको जनाएको छ । रोयटर्सका अनुसार, टिङ्री काउन्टी पर्यटन कम्पनीले शनिबारदेखि एभरेस्ट रमणीय क्षेत्रको टिकट बिक्री र प्रवेशमा अस्थायी रूपमा रोक लगाएको छ ।