काठमाडौं । कलाकार तथा मोडेल विशाल खरेलसँगको ‘इन्गेजमेन्ट’ का कारण विवाद र आलोचनामा परेकी चर्चित अभिनेत्री साम्राज्ञी शाहले आफ्नो सम्बन्धको बचाउ गर्दै मुख खोलेकी छन् । दुई वर्षको बच्चाको बुवासँग इन्गेजमेन्ट गरेको भन्दै आलोचना खेपिरहेकी उनले सामाजिक सञ्जालमा एउटा पोष्ट गर्दै खरेलसँग इन्गेजमेन्ट गरेकोमा कुनै पछुतो नरहेको स्पष्ट पारेकी छिन् ।
‘मंगेतर’ पछि आफूहरू कानुनी रूपमा बलियो बनेको जनाउँदै उनले इन्गेजमेन्ट गरेकोमा कुनै पछुतो नभएको बताएकी छन् । विशालको विवाह नभएको दाबी गर्दै उनले प्रेमिकासँगको सम्बन्धबाट बच्चा जन्मिएको बताएकी छन् । उनले भनेकी छन्, ‘अर्को कुरा, उनले मलाई स्पष्टै भनेका थिए कि उनको एक्स–गर्लफ्रेण्डसँगको एउटा छोरा छ । उनीहरूको कहिल्यै विवाह भएको थिएन ।’ प्रेमिकासँगको सम्बन्धबाट बच्चा जन्मिएकाले उनीहरूको सम्बन्ध विच्छेद हुन आवश्यक नरहेको साम्राज्ञीले तर्क गरेकी छन् ।
उनले भनेकी छन्, ‘तपाईंहरू सधैं प्रमाण बिना नै सबैभन्दा नराम्रो कुरा मात्रै विश्वास गर्नु हुन्छ । भावनात्मक रूपमा कुरालाई अन्तै मोड्नु हुन्छ, जुन म बुझ्छु । तर तपाईंहरूले सार्वजनिक रूपमा पुर्याएको क्षति के ? झुटमाथि झुट ?’ आफू र आफ्नो ‘मंगेतर’ माथिको प्रहार बन्द गर्न आग्रह गर्दै साम्राज्ञीले अहिले पनि विशालले पूर्व प्रेमिकाबाट मानसिक रूपमा तनाव खेपिरहेको दाबी गरेकी छन् । अहिले पनि विशाललाई उनले ब्ल्याकमेल गर्ने गरेको साम्राज्ञीको भनाइ छ । विशालले भने साम्राज्ञी र उनको पूर्व प्रेमिकाबारे अहिलेसम्म कुनै प्रतिक्रिया दिएका छैनन् ।
