काठमाडौं । ‘हाम्रो पार्टी नेपाल’ नामक नयाँ राजनीतिक दल आज औपचारिक रूपमा घोषणा हुँदैछ । राजधानीको बालुवाटारस्थित टी–२१ प्यालेसमा आयोजना हुने समारोहमार्फत दलले आफ्नो विधिवत आरम्भ गर्न लागेको हो । पार्टीका प्रेस संयोजक सोबिन्द्र परियारका अनुसार घोषणा सभाको सम्पूर्ण तयारी पूरा भइसकेको छ र कार्यक्रम आज मध्यान्ह १२ः०० बजे सुरु हुनेछ । दलको घोषणामा सामाजिक अभियन्ता खगेन्द्र सुनार प्रमुख अतिथिका रूपमा उपस्थित हुनेछन् । लामो समयदेखि सामाजिक न्याय, समावेशी अधिकार, नागरिक सरोकार र जनदबाबका मुद्दामा सक्रिय सुनारकै अग्रसरता र वैचारिक नेतृत्वमा यो दल अघि बढ्न लागेको बुझिएको छ । सुनार नेतृत्वको हाम्रो पार्टी नेपालले आफ्नै निर्वाचन चिन्हबाट चुनाव लड्ने भएको छ ।
सुनारले यसअघि मन्त्री कुलमान घिसिङको अगुवाइमा खोलिएको ‘उज्यालो नेपाल पार्टीकै बलेको चिम चिन्ह लिएर निर्वाचनमा जान निर्वाचन आयोगमा निवेदन दिएका थिए । तर कानुनी लगायतका जटिलताको कारण देखाउँदै पार्टीले आफ्नै निर्वाचन चिन्ह लाइक लिएर चुनाव लड्न पुनः आयोगमा निवेदन दिएको हो । एकल चुनाव चिन्ह लिएर निर्वाचनमा जाँदा धेरै मत ल्याउने पार्टीले संसदीय दल बनाउने र त्यही पार्टीको ह्वीपसमेत लाग्ने भएकाले आफ्नै चिन्हमा चुनावमा जान लागिएको अध्यक्ष सुनारले जानकारी दिएका छन् ।
