काठमाडौँ / लुम्बिनी प्रदेशका मुख्यमन्त्री डिल्ली बहादुर चौधरीले आयआर्जनका योजना बनाएर आए प्रदेश सरकारले बजेटको अभाव हुन नदिने बताउनुभएको छ ।

नेपाल महिला संघ दाङले आइतवार घोराहीमा आयोजना गरेको कार्यक्रममा बोल्दै मुख्यमन्त्री चौधरीले विभिन्न समुदायलाई लक्षित गरी प्रदेश सरकारले बजेटको व्यवस्था गरेकाले त्यसै अनुरुप योजना लिएर आउन महिला तथा युवाहरुलाई आग्रह गर्नुभएको हो ।

थारु, दलित, बादी, जनजातिलगायतका समुदायको आय स्तर बृद्धिका लागि बजेट डिजाइन गरेको बताउदै चौधरीले उत्पादन र स्वरोजगारमूलक कार्यक्रम ल्याउन महिलाहरुलाई आह्वान गर्नुभयो । १ अर्ब बजेट महिलाहरुको आयआर्जनका लागि छुट्याएकाले महिलाहरुलाई घरघरमा उत्पादनका कार्यक्रम ल्याउन सुझाव दिनुभयो । यसअघि धेरैजसो बजेट सडकमा खर्च हुने गरेको भन्दै मुख्यमन्त्री चौधरीले उद्यमशीलतामा जोड दिन महिलालाई प्रोत्साहन गर्नुभयो ।