काठमाडौं । राष्ट्रिय प्रजातन्त्र पार्टीका सांसद ज्ञानेन्द्र शाहीले भ्रष्टाचारका फाइल खोलेर सरकार ढल्यो भनेर गलत भाष्य सृजना नगर्न आग्रह गरेका छन्।

शुक्रबारको प्रतिनिधिसभा बैठकमा प्रधानमन्त्री पुष्पकमल दाहालले पेश गरेको विश्वासको मतको प्रस्तावमाथिको छलफलमा भाग लिँदै सांसद शाहीले गृहमन्त्री रवि लामिछानेलाई इंगित गर्दै फाइल खोलेर सरकार ढल्यो भनेर गलत भाष्य सृजना नगर्न आग्रह गरेका हुन् ।

उनले ठूला नेताहरू मिलेर नै सरकार ढलेकाले त्यसलाई विषयान्तर नगर्न आग्रह गरे । उनले भने, ‘ठूला नेताबीच सर्त नमिल्या हुनाले सरकार ढल्यो भने त भइहाल्यो नि । फाइल खोलेर एउटा मान्छे जेल हालेको छैन । कहाँ फाइल छ । न निर्मला पन्तको हत्यारा पक्राउ गरेको छ। न त जीबी राई पक्राउ परेका छन्। न सहकारी ठगीका दोषी जेल गएका छन्। फाइल खोलेर सरकार ढल्यो भनेर गलत भाष्य सृजना नगर्नुहोस्।’

सांसद शाहीले जातीय छुवाछूतविरुद्धको कानुन राजाको पालामा नै बनेको उल्लेख गर्दै अहिलेका राजनीतिक दलले यसको श्रेय लिएर जातजातिलाई भड्काउन नहुनेमा जोड दिए ।

उनले भने, ‘रुकुमपश्चिममा नवराज विकको हत्या गणतन्त्रपछि नै भएको हो, राजाको पालामा होइन । अब फेरि राजनीतिक कारणले मुलुक युद्धमा नधकेलियोस्, जातजातिका नाममा राजनीति नगरियोस् ।’