काठमाडौं । नेकपा एमालेका महासचिव शंकर पोखरेलले बीआरआई कार्यान्वयनका सन्दर्भमा कांग्रेस र एमालेबीच समान धारणा बनेको बताएका छन् ।

शनिबार राति सामाजिक संजालमार्फत महासचिव पोखरेलले अव बीआरआई अन्तरगतको चिनियाँ सहयोग परिचालनका सन्दर्भमा साझा फ्रेमवर्क तयार भएसंगै परियोजना कार्यान्वयनमा सहजता हुने बताएका हुन् ।

उनले बीआरआईका सन्दर्भमा प्रमुख दलहरु बीचको सहमतिले अन्तर्राष्ट्रिय मामिलामा साझा राष्ट्रिय दृष्टिकोण तयार गर्ने सुखद प्रकृया आरम्भ भएको मान्न सकिने समेत बताएका छन् ।

उनले भनेका छन्, ‘बीआरआईको कार्यान्वयका सन्दर्भमा नेपालका प्रमुख राजनीतिक दलहरु नेपाली कांग्रेस र नेकपा(एमाले)ले साझा धारणा बनाउने काम गरेका छन् । विगतमा बीआरआईका सन्दर्भमा नेपालले एमओयू हस्ताक्षर गरेपनि सो अन्तरगतका परियोजनाहरु अघि वढ्न सकेका थिएनन् । अब बीआरआई अन्तरगतको चिनियाँ सहयोग परिचालनका सन्दर्भमा साझा फ्रेमवर्क तयार भएसंगै परियोजना कार्यान्वयनमा सहजता हुनेछ । प्रधानमन्त्रीको आसन्न चीन भ्रमणमा यस सहमतिले सार्थकता पाएसँगै नेपालको विकासमा चिनियाँ सहयोग परिचालनमा तिव्रता आउनेछ । बीआरआईका सन्दर्भमा प्रमुख दलहरु बीचको सहमतिले अन्तर्राष्ट्रिय मामिलामा साझा राष्ट्रिय दृष्टिकोण तयार गर्ने सुखद प्रकृया आरम्भ भएको मान्न सकिन्छ ।’