झापा । प्रहरीले झापामा ८३ वर्षीया वृद्धाको हत्या गरेको आरोपमा दुई जनालाई पक्राउ गरेको छ । झापा गाउँपालिका–६ पुष्पाञ्जली टोल बस्ने ८३ वर्षीया वृद्धा फुलमाया मुर्मुको हत्या गरेको आरोपमा प्रहरीले दुई जनालाई पक्राउ गरेको हो ।

पक्राउ पर्नेमा झापाको झापा गाउँपालिका–७ का २८ वर्षीय अजय यादव र झापाकै शिवसताक्षी नगरपालिका–७ का २४ वर्षीय अशोक यादव छन् । उनीहरुलाई जिल्ला प्रहरी कार्यालय झापाको टोलीले पक्राउ गरेको हो ।

मंसिर २२ गते मुर्मु मृत भेटिएकी थिइन् । त्यसपछि अनुसन्धानका क्रममा वृद्धालाई टाउको र चिउडोमा प्रहार गरी हत्या गरेको खुलेको थियो । प्रहरीले आरोपीले हत्यामा प्रयोग भएको कलको ह्याण्डिल र फरुवा समेत बरामद गरेको छ । हत्यापछि लुटिएको मोबाइल र एउटा साइकल समेत प्रहरीले बरामद गरेको जनाएको छ ।