ललितपुर । ललितपुर महानगरपालिकाका नगर प्रमुख चिरीबाबु महर्जनले नेपाल प्रहरीसँग साझेदारी गरेका कामहरु सबै सफल भएको बताएका छन् ।बिहीबार ललितपुरमा लागु औषध दुरुपयोग एवम् ओसारपसार विरुद्धको अन्तर्राष्ट्रिय दिवसको अवसरमा आयोजित लागु औषध दुव्र्यसनरहित घर अभियान कार्यक्रममा बोल्दै उनले ललितपुर महानगरपालिकाले धेरै कामहरु नेपाल प्रहरीको सहकार्यमा भएको र सबै सफल भएको बताएका हुन् ।

‘ललितपुर महानगरपालिकाले नेपाल प्रहरीसँग साझेदारी गरेका काम एकदमै सफल भएको छ । हामीले गरेका काममा नेपाल प्रहरीको धेरै सहयोग छ । यसका निम्ति म सम्पूर्ण प्रहरीहरुमा धन्यबाद,’ उनले भने ।

उनले ललितपुर महानगरपालिकामा मुलुककै चुस्त र दुरुस्त नगर प्रहरीहरु रहेको भन्दै नेपाल प्रहरीको अभियानमा सामेल गराउन आग्रह समेत गरे ।

‘ललितपुर महानगरपालिकामा मुलुककै चुस्त र दुरुस्त नगर प्रहरीहरु छन् । नगर प्रहरी प्रमुख निकै ख्यातिप्राप्त हुनुहुन्छ । उहाँकै कमाण्डमा १२५ जना नगर प्रहरीहरु छन् । उहाँले यो अभियान साथै लैजानु हुनेछ । नेपाल प्रहरीसँग रहेको अनुभव नगर प्रहरीलाई हस्तान्तरण गर्न आग्रह गरे,’ उनले भने ।

यस्तै, प्रहरी महानिरीक्षक दिपक थापाले लागु औषध दुव्र्यसनरहित घर अभियान लागु औषध दुरुपयोग एवम् ओसारपसार न्यूनीकरणका लागि कोषेढुङ्गा सावित हुने बताए ।