काठमाडौं । अभिनेत्री वर्षा राउत पछिल्लो समय आफ्नै वैवाहिक जीवनसँग जोडिएको विवाद, सार्वजनिक टिप्पणी र सामाजिक दबाबका कारण अत्यधिक भावनात्मक तनावमा रहेको बताउँदै खुलेर मनका कुरा शेयर गरेकी छन् । श्रीमान सञ्जोग कोइरालासँगको सम्बन्धबारे फैलिएका चर्चापछि आएका विभिन्न आरोप–आक्षेपले आफूलाई मनोवैज्ञानिक रूपमा निकै थिचेको उनले सामाजिक सञ्जालमार्फत् प्रस्ट्याइन् ।

सञ्जोगसँग सम्बन्ध बिग्रिएको चर्चा बढिरहेका बेला वर्षा माइतीतिर बसेको खबर, चलचित्र प्रिमियरमा देखिएका दाग जस्ता चिन्ह तथा डिभोर्सको हल्लाले सामाजिक सञ्जालमा थप गसिपको लहर चलायो । यद्यपि दुवैले संयुक्त अन्तर्वार्ता दिएर दाम्पत्यमा गम्भीर समस्या नभएको दाबी गरिसके पनि, वर्षामाथि टिप्पणी र प्रश्नको वर्षा रोकिएन । यिनै निरन्तरका टिप्पणीबीच एक सामाजिक सञ्जाल प्रयोगकर्ताले अन्तर्वार्तामा सञ्जोगलाई ‘तँ’ किन भनियो भनेर खिज्याएपछि वर्षा निकै भावुक हुँदै समाजको दोहोरो मापदण्डले आफूलाई मानसिक रूपमा आहत बनाइरहेको बताइन् ।

उनले लेखेकी छन्, ‘कहिलेकाहीँ मान्छेले आत्महत्याका विचार ल्याउनुपर्ने अवस्था आउँछ, किनकि त्यो चाहेर होइन—समाजको अपेक्षा, दबाब र अन्यायले मान्छेलाई अन्धकारतिर धकेलिदिन्छ ।’ वर्षाको बुझाइमा, पतिले श्रीमतीलाई ‘तँ’ भन्दा समाजले सामान्य ठान्ने तर महिलाले त्यही शब्द प्रयोग गर्दा उग्र प्रतिक्रिया देखाउने प्रवृत्तिले महिलालाई अझै पनि असमान व्यवहार भोग्न बाध्य बनाएको छ ।

उनले थपेकी छन्, ‘श्रीमतीलाई ‘लाटी’, ‘अलच्छिनी’ जस्ता अपमानजनक शब्द बोलिँदा समाज मौन बस्छ। तर महिलाले आफ्नो आवाज उठाउन खोज्यो भने उसैलाई दोषी बनाइन्छ ।’ वर्षाले आफूलाई थिचिरहेको सामाजिक दवाब, अन्याय र असंवेदनशील प्रतिक्रियाले धेरै पटक एक्लो महसुस भएको र यसले मानसिक स्वास्थ्यमा गम्भीर असर पारेको बताइन् ।

‘यो समाजमा बाँच्न मलाई साँच्चिकै धेरै गाह्रो भइसकेको छ’, वर्षाले लेखेकी छिन् । उनको भावनात्मक पोस्टपछि श्रीमान सञ्जोग कोइरालाले समेत प्रतिक्रिया दिँदै उनलाई साथ दिने आश्वासन व्यक्त गरे । उनले लेखे, ‘घृणामाथि प्रेम सधैं जित्छ । चिन्ता नगर, तिमीलाई हजारौँले माया गर्छन् । आज टिप्पणी गर्नेले भोलि बाटोमा भेट्दा ‘बिग फ्यान’ भन्छन् ।’ वर्षा र सञ्जोगले सम्बन्धमा समस्या नरहेको दाबी गरे पनि वर्षाले सार्वजनिक रूपमा व्यक्त गरेको पीडा र समाजप्रतिको असन्तुष्टिले नेपालमा महिलामाथि भइरहेको सामाजिक धारणाबारे गम्भीर प्रश्न उठाएको छ ।