काठमाडौं । राष्ट्रिय स्वतन्त्र पार्टी (रास्वपा) र उज्यालो नेपाल पार्टीबीच पार्टी एकता र सहकार्यका लागि चलिरहेको संवाद अझै निष्कर्षमा पुगेको छैन । उज्यालो नेपाल पार्टीका प्रवक्ता डा. राजु थापाका अनुसार, दुई पक्षबीच चुनाव चिह्न, पार्टी नाम र नेतृत्व व्यवस्थापनसम्बन्धी विषयमा छलफल भए पनि रास्वपाबाट पटक–पटक नयाँ शर्तहरू राखिँदा सहकार्य सुनिश्चित हुन सकेको छैन ।

डा. थापाका अनुसार, उज्यालो नेपाल पार्टी रास्वपाको चुनाव चिह्न ‘घण्टी’ स्वीकार गर्न तयार छ । एकता प्रक्रियामा पार्टीको नाम मिलाएर अघि बढ्ने, रास्वपाकै चुनाव चिह्न राख्ने र केन्द्रीय समिति समायोजन गर्ने विषयमा वार्ता भइरहेको छ । नेतृत्व व्यवस्थापनको पक्षमा उज्यालो नेपालले कार्यकारी भूमिकासहितको वरिष्ठ उपाध्यक्ष पद सिर्जना गर्नुपर्ने प्रस्ताव पनि अघि सारेको छ ।

उनले भने, ‘हामीले सहकार्यका लागि लामो समयदेखि रास्वपासँग संवाद गरिरहेका छौं । पार्टी दर्ता ढिला हुनुको एउटा प्रमुख कारण पनि यही अनौपचारिक संवाद हो । दर्ता भइसकेपछि पनि संवाद निरन्तरता दिँदै सहकार्यको प्रयास गर्दैछौं ।’ यसैबीच, उज्यालो नेपाल पार्टी मंसिर १७ गते औपचारिक रूपमा घोषणा हुने भएको छ । कार्यक्रमका प्रमुख अतिथि कुलमान घिसिङ हुनेछन् ।