काठमाडौं। काठमाडौं महानगरपालिकाका मेयर समेत रहेका र्‍यापर बालेन शाहको र्‍याप ‘आम नेपाली बुवा’को नयाँ भिडियोसहित सार्वजनिक भएको छ। चलचित्र झरीपछिको इन्द्रेणीका लागि तयार पारिएको भिडियो आज युट्युबमा सार्वजनिक भएको हो ।

यो र्‍यापमा एक जना इमान्दार सरकारी कर्मचारीले परिवारमा भोग्ने समस्या देखाइएको छ ।

लक्ष्मीप्रसाद देवकोटाको कविता ‘यात्री’ कविताको केही हरफ गीतका र्‍यापको कोरसको रुपमा प्रयोग गरिएको छ । देवकोटाको यात्री कविता रविन शर्माको स्वरमा रेकर्ड भएको थियो । यो र्यापको कोरसका लागि भने दिक्षा उप्रेतीले स्वर दिएकी छिन् ।

सिंहदरबार वैद्यखानाका पूर्वप्रबन्ध निर्देशकसमेत रहेका बालेनका बुवा डा.रामनारायण शाहको निधन भएको दुई सातापछि ‘आम नेपाली बुवा’को भिडियो दर्शकहरूमाझ आएको हो । यो र्यापको रेकर्डिङ र छायांकन भने केही समय पहिले नै भइसकेको थियो ।

चलचित्र झरीपछिको इन्द्रेणीको प्रदर्शन पुष ४ गतेबाट सुरू हुनेछ ।