काठमाडौं– नेपाली कम्युनिस्ट पार्टी (नेकपा)का नेता इन्द्रबहादुर आङ्बो ‘मौसम’ले जेन–जी विद्रोहपछि राज्यका संरचनामा अपेक्षित परिवर्तन हुन नसकेको बताएका छन् ।

उनले सुशासन र भ्रष्टाचार अन्त्यको मूल एजेन्डा बोकेर भएको विद्रोहपछि गठन भएको जेन–जी समर्थित सुशीला कार्की नेतृत्वको नागरिक सरकारले ती एजेन्डाअनुसार राज्य संयन्त्रलाई पुनर्संरचना गर्न नसकेको आरोप लगाए ।

‘जेन–जी आन्दोलनपछि राज्यका संरचनाहरूमा धेरै ठूलो परिवर्तन हुुनुपर्थ्याे । त्यो हुन सकेन,’ उनले इलाममा आइतबार आयोजित पार्टीको एकता सन्देशसभामा भने, ‘मात्रै अहिले २०८४ को चुनाव २०८२ मा हुने आएको छ ।’

उनले हालै रास्वपा गएका जेन–जी अगुवा दाबी गर्ने सुदन गुरुङ, काठमाडौंका प्रमुख बालेन साह र रास्वपा समेतलाई लक्षित गर्दै ‘सिंहदरबार जलाउनेहरूलाई सम्मान छैन’ भनेका छन् ।

उनले भने, ‘लुकेर विदेशीहरूको षड्यन्त्रमा सिंहदरबार, शीतलनिवास सर्वोच्च अदालतजस्तो सारा नेपालको गौरवको सम्पूर्ण सम्पदा नष्ट गर्ने नयाँ भनाउँदा पार्टीहरूलाई सम्मान गर्नेवाला छैनौँ ।’

उनले आगामी २१ फागुनको प्रतिनिधिसभा निर्वाचनमा सिंहदरबार जलाउनेहरूलाई होइन, नेपाली जनताको मुक्तिको विचार बोक्ने नेपाली कम्युनिस्ट पार्टी र त्यसका उम्मेदवारलाई विजयी गराउन आग्रह गरे ।