काठमाडौं । राष्ट्रिय स्वतन्त्र पार्टी (रास्वपा)को बृहत् राजनीतिक समायोजन घोषणासभामा कुलमान घिसिङ र बालेन्द्र साह ‘बालेन’ देखिएका छैनन् ।

घिसिङ पार्टीको वरिष्ठ उपसभापति र बालेन वरिष्ठ नेता हुन् ।

पूर्वनागरिक उन्मुक्ति पार्टी र थरुहट आन्दोलनका केही नेतालाई एकता प्रक्रियामा ल्याउन भएको समायोजन घोषणासभामा घिसिङ र बालेनको अनुपस्थिति अर्थपूर्ण मानिएको छ । कारण, रास्वपामा खासगरी घिसिङ असन्तुष्ट छन् ।

घिसिङले हालै उनी संरक्षक रहेको उज्यालो नेपाल पार्टीलाई रास्वपामा विलय गराएका थिए ।

तर, पार्टीको सैद्धान्तिक र वैचारिक पक्षसँगै सांगठनिक जिम्मेवारीलाई लिएर असन्तुष्टि जनाउँदै आएका छन् । भनिन्छ, बालेन केन्द्रीय सदस्य मनोनयनप्रति त्यति खुसी छैनन् ।

आइतबार बसेको रास्वपा सचिवालय बैठकले बालेन र विवेकशील साझा पार्टीबाट समायोजन प्रक्रिया आएका नेताहरूलाई केन्द्रीय सदस्य मनोनीत गरेको थियो ।

कुलमान पक्षलाई छुटाइएको थियो ।