राष्ट्रिय स्वतन्त्र पार्टी (रास्वपा) र नागरिक उन्मुक्ति पार्टी (नाउपा)काे एउटा समूहबीच एकता भएपछि नाउपा औपचारिक रुपमा तीन टुक्रा भएको छ । 

सोमबार राष्ट्रिय सभामा भएको समायोजन कार्यक्रमपश्चात् नाउपा रास्वपामा समाहित भएको हो। समायोजन कार्यक्रमका लागि तयार पारिएको समायोजन सहमति पत्रमा नाउपाको तर्फबाट वरिष्ठ उपाध्यक्ष दामोदर पण्डितले हस्ताक्षर गरेका छन् भने तथा रास्वपाका तर्फबाट उपाध्यक्ष डोलप्रसाद अर्यालले हस्ताक्षर गरेका छन् । साथै, थरुहट आन्दोलनका नेता लक्ष्मण थारु र सुरेन्द्र चौधरीले पनि सहमति पत्रमा हस्ताक्षर गरेका छन् ।

नागरिक उन्मुक्ति पार्टीको अध्यक्ष रहेकी रञ्जिता श्रेष्ठले यसअघि नै पुष्पकमल दाहाल प्रचण्ड नेतृत्वको नेपाली कम्युनिष्ट पार्टीसँग एकता गरिसकेकी छिन् । त्यस्तै, पार्टीका संस्थापक नेता रेशम चौधरी नेतृत्वमा रहेको तेस्रो समुहले अशोक राई नेतृत्वको जनता समाजवादी पार्टी, राजेन्द्र महतो नेतृत्वको राष्ट्रिय मुक्ति पार्टीसँग गठबन्धन गरेर चुनावमा जाने निर्णय गरिसकेका छन् ।  यी तीन समूहबीच जाँतो चुनाव चिन्ह लिएर चुनाव लड्ने सहमति भएको हो ।  

यसअघि रेशम चौधरी नेतृत्वको नागरिक उन्मुक्ति पार्टी नेपाल र रन्जिता श्रेष्ठ नेतृत्वको नागरिक उन्मुक्ति पार्टीबिच केही दिन अगाडी मात्रै एकता भएको थियो । श्रीमानश्रीमतिबीचको विवादले विभाजन भएको पार्टी ४ महिनापछि एकता भएको थियो । तर, यो एकता केही दिन पनि टिक्न सकेन । एकता गरेको केही दिनमा नै रञ्जिाताले नेकपासँग एकता गरिन् भने रेशमले महतो र राईसँग गठबन्धन गरे । रेशम र रञ्जिता अलगअलग बाटो लागेपछि अरू थारू अभियन्ता भने रास्वपासँग नजिकिएका हुन् । 

 नाउपाको राजनैतिक विरासत २०७२ भदौमा भएको टिकापुर घटना हो।  संविधान घोषणाको करिब एक महिनाअघि कैलालीको टिकापुरमा भएको घटनामा एक नाबालक सहित सात प्रहरीको ज्यान गएको थियो। रेशम चौधरीमाथि यो घटनाको मुख्य योजनाकार भएको आरोप लगाइएको थियो । 

यही आरोपमा जेलमा रहेका चौधरीले राष्ट्रिय जनता पार्टीबाट २०७४ सालको प्रतिनिधि सभा निर्वाचन जिते। निर्वाचन जितेको ४ वर्ष (२०७८) सम्म जेलमै रहेका रेशमले २०७८ मै जेलबाटै आफु संरक्षक रहने गरी पत्नी रंजीता चौधरीको नाममा नागरिक उन्मुक्ति पार्टी दर्ता गराए। 

२०७८ मा निर्वाचन आयोगमा दर्ता भएको नाउपाले २०७९ को प्रतिनिधि सभा निर्वाचनमा पश्चिम नेपाल (कैलाली) बाट तीन र बर्दियाबाट एक सीट जित्न सफल बन्यो। तर पार्टी स्थापनाकै चार वर्षमा नाउपा फुटेर तीन ठाउँमा पुगेको हो ।